Siguria ushqimore “thikë me dy presa”, Rama: Nëse bizneset nuk plotësojnë standardet do mbyllen
Kryeministri Edi Rama, në një takim me operatorët e biznesit ushqimor, u ndal te sfidat e plotësimit të standardeve sipas direktivave të BE-së për çështjet e sigurisë ushqimore.
Ai tha se, përveç masave që do të ndërmerren nga qeveria në adresimin e problematikave si akreditimi i laboratorëve dhe infrastruktura digjitale për të lehtësuar ndërveprimin me operatorët, edhe sipërmarrjet duhet të investojnë në përmbushjen e standardeve. Sipas tij, në të kundërt, ato rrezikojnë të mbyllen ose të falimentojnë.
“Procesi i sigurisë ushqimore ka një rëndësi të veçantë, sepse lidhet me sfidën më komplekse të anëtarësimit në BE, atë të sigurisë ushqimore.
Kemi detyrimin të harmonizojmë kuadrin ligjor të vendit me BE-në, në të gjitha drejtimet. Na duhet modernizimi i sistemit veterinar dhe i rrjetit të laboratorëve, të cilat nuk mund të konsiderohen detyra, por zgjedhje të pashmangshme për të nesërmen tonë.
Por ligji, sado mirë të jetë shkruar, punën e bëjnë njerëzit që zbatojnë ligjin, ata që përballen çdo ditë me informalitetin, për të drejtat e konsumatorit, të fermerit dhe sipërmarrësit, për të garantuar një konkurrencë të ndershme.
Së shpejti do të kemi një binjakëzim të AKU-së dhe Institutit të Veterinarisë.
Problematikat mbeten si të informojmë në kohë dhe hapur sipërmarrjen për atë që e pret. Ajo që e pret sipërmarrjen është si një thikë me dy presa: nga njëra anë një horizont mundësish për ata që do të jenë të përgatitur, dhe nga ana tjetër një rrezik falimentimi për ata që nuk janë të përgatitur.
Siguria e produkteve shtazore dhe e të gjitha nënprodukteve të tjera duhet të jetë e qartë për të gjithë ata që kanë investuar, qoftë edhe një baxho e vogël. Nesër do të jetë fatale nëse nuk kuptojnë se ku janë me standardet dhe çfarë duhet të bëjnë për të qenë gati.
Duhet të veprojmë me rreth 900 subjekte, të cilat të gjitha kanë rrezik, në kushtet ku janë, rrezik për mbyllje ose përjashtim nga tregu që në ditën e parë të anëtarësimit.
Kryeminsitri Edi Rama u ndal edhe te problematikat për sektorin e qumështit dhe thertoreve.
“Çështja tjetër është ajo e thertoreve. Kemi bërë një stabilizim kur morëm këtë detyrë, ku gjëja e gjallë në Kamëz therrej në trotuar, por tani kemi kaluar në një nivel tjetër. Është shumë më mirë se ç’ishte, por ende larg nivelit për të marrë certifikimin për të hyrë në tregun europian.
Çdo gjë që do të prodhohet në Shqipëri dhe do të dalë në dyqan, do të konsiderohet si produkt për tregun e dyqaneve të BE-së. Për thertoret, problemi më i madh është ndarja dhe menaxhimi i mbetjeve që nuk janë për konsum. Nëse thertoret nuk plotësojnë kushtet, ato nuk mund të mbijetojnë.
Sektori i qumështit është një tjetër sektor që, nëse do të ishim sot anëtarë të BE-së, nuk do t’i mbijetonte kërkesave të standardeve. Kjo sepse i gjithë zinxhiri i prodhimit duhet të jetë i garantuar. Unë kam vizituar fabrika që janë me teknologji të avancuar, por zinxhiri mbetet i mangët dhe duhet të plotësohen standardet në tërësi”./Monitor/
