Edi Rama: Karçanaj jeton me qira! Sot SPAK sekuestroi 2 banesa dhe 1 vilë të Ish-Drejtoreshës së AKSHI-t dhe pasuri të Ergys Agasit me vlerë 40 mln euro
Të gjithë e kujtojmë deklaratën e Kryeministrit Edi Rama që të këpuste shpirtin se Ish-Drejtoresha e AKSHI-t, Mirlinda Karçanaj, nuk ka shtëpi e as makinë dhe se jetonte me qira, por, pas aksionit të sotëm të SPAK për sekuestrimin e një pasurie me vlerë 40 milionë euro, rezulton se Edi Rama gënjeu!
Kështu, dje SPAK sekuestroi 40 mln euro që i përkasin grupit të Ergys Agasit, mes tyre pasuri të vetë biznesmenit, apo dhe të Ish-Drejtoreshës së AKSHI-it, Marlinda Karçanaj dhe Ermal Beqirit.
SPAK, në bashkëpunim me policinë, zbarkuan në “Equos Resort” pasi aty Agasi disponon disa vila të ndërtuara pa leje, dhe po planifikohej që të ndërtoheshin të tjera resorte me eksponentë të krimit, aty ku u sekuestruan edhe një sërë verërash të shtrenjta, raporton News24, duke saktësuar se Agasi bashkë me Beqirin konsiderohen si krerë të grupit kriminal që bënte shantazhe dhe merrte peng biznesmenë duke u tërhequr nga tenderat në AKSH.
Mes të tjerash, raportohet se SPAK ka sekuestruar prona dhe Ish-Drejtoreshës së AKSHI-t, Marlinda Karçanajt, 2 apartamente në Tiranë dhë një në Qerret.
“Kryeministri i vendit për të relativizuar veprimtarinë e këtij grupi në Tiranë, deklaroi se Karçanaj jetonte me qira, ndonëse në një pallat te Air Albania. Zonja Karçanaj disponon përmes palëve të treta disa pasuri. Shoferi i zonjës Karçanaj ka dhënë detaje se ku jetonte. Po ashtu SPAK pretendon se Karçanaj ka marrë 200 mijë euro ryshfet, të vendosura në shishe për të shmangur dyshimet për shkak të pozicionit që mbante në AKSH,” raporton News 24 duke përfunduar:
“Rezulton se ajo jetonte me qira të ulëta, por faktet kanë treguar se këtë pasuri ia kishte dhënë me qira të ulët në çështje nderi Agasit. Por mendohet se disponohet nga vetë Karçanaj. Ndërkohë Agasit i janë sekuestruar pasuri dhe llogari bankare. Kjo është goditja e dytë që bën SPAK, që dyshohet se drejtohet nga Agasi. Jo vetëm Geron Meçe, dyshohet se janë marrë peng dhe shtetas të tjerë. Dhe një shtetase shqiptaro-gjermane dyshohet se ka paguar 2.5 mln eurosh pasi ka qenë në presion dhe shantazh nga ky grup.”
