Edi Rama e mbylli dosjen e tij me Ballukun! Berisha: Duhet të përgatitemi për kryengritje të fuqishme!

Edi Rama e mbylli dosjen e tij me Ballukun, tha sot Kryetari i Partisë Demokratike, Sali Berisha, para Grupit Parlamentar të PD duke theksuar se duhet të përgatiten për kryengritjen më të fuqishme që ka njohur vendi.

Pas kësaj mbledhje fillojmë menjëherë përgatitjet për protestën e ardhshme, tha Kryetari i Partisë Demokratike ndërsa paralajmëroi se datën e protestës do e shpallin shumë shpejt.

“Së pari, dua të përshëndes edhe njëherë ata dhjetëra mijëra qytetarë që të premten e kaluar me pjesëmarrjen e tyre në kryengritjen paqësore u bënë zëri i qytetarëve në Shqipëri, në Europë dhe në botë.
Një përshëndetje të veçantë kam për heronjtë e kësaj proteste, të cilët sot ndodhen në burgjet e narkodiktaturës dhe i garantoj ata se burgosja e tyre politike do kthehet në një ndëshkim të padiskutueshëm ndaj regjimit të Edi Ramës.

I përgëzoj për qëndrimin burrëror të pathyeshëm në qelitë e narkoshtetit dhe u shpreh edhe mirënjohjen dhe solidaritetin tonë të plotë.
Unë gjithashtu shpreh revoltën më të madhe, denoncimin më të ashpër për sulmin brutal që u bë ndaj deputetëve tanë në protestën e 17 prillit. Sulm i planifikuar. Sulm i organizuar në të cilin u përdorën ndaj deputetëve dhe protestuesve të gjitha mjetet e dhunës, granata, spraj ariu, spraj toksik, plumba gome, pompa uji dhe shishe molotov.
Goditja e deputetëve, të cilët janë një faktor madhor në garantimin e karakterit paqësore të kryengritjes tonë, përbën aktin më primitiv të Edi Ramës ndaj kundërshtarëve politikë.
Frikacak dhe i paburrë, gjen banditë me uniformë për të goditur deputetët e opozitës.
Të gjitha këto janë një detyrim i ri madhor i yni për të vazhduar protestat e fuqishme, për të vazhduar kryengritjen tonë paqësore,” tha Sali Berisha duke paralajmëruar përgatitjen për kryengritjen më të fuqishme që ka njohur vendi.

“Sot, ata që guxojnë të ngrihen për dinjitet, të ngrihen kundër këtij regjimi, mbrojnë jo vetëm idealet e tyre, por mbrojnë dinjitetin dhe idealet demokratike të çdo shqiptari.
Dhe duhet të pranojmë se në kushtet aktuale, kurrë ndonjëherë në historinë e këtij vendi, protesta nuk ka qenë, kryengritja nuk ka qenë më e domosdoshme dhe më jetike për vendin.
Edi Rama mendoi se mbylli aferat që shkoi 1.2 miliardë të tij me Lubi Ballukun.
Dhe e vërteta është, duhet të pranojmë, pas tre muajsh, ai i mbylli dyert përfundimisht organit të akuzës.
Dhe e mbylli dosjen e tij me Ballukun, kjo është e pamohueshme.
E mbylli me prokurorët.
E mbylli, pavarësisht se një seri vendesh të BE kërkuan që prokuroria e vendit të mos pengohej në funksionimin e saj.
Kështu që sot ai mendon dhe ndjehet më i fortë se kurrë bazuar në aktet antikushtetuese dhe antikriminale që ka ndërmarrë. Ndaj dhe sot është më e domosdoshme se kurrë protesta jonë. Ndaj dhe sot beteja jonë është më jetike se kurrë për këtë vend. Në ndërgjegjen e çdo shqiptari duhet të jetë e qartë thellë se rruga e vetme për të ndaluar këtë të keqe të madhe është protesta.
Edhe njëherë, Edi Rama e nxori veten mbi ligjin, nuk pyet më për Kushtetutë, nuk pyet më për drejtësi, nuk pyet më as për partnerët ndërkombëtare.
Ose të themi nuk pyet për ata që kërkojnë që në Shqipëri të funksionojë shteti ligjor, të funksionojë Kushtetuta, të garantohet barazia para ligjit. Për këta ai nuk pyet më. Atëherë çfarë do bëjmë ne në këto rrethana? Në këto kushte?
Ne do ngrihemi edhe më fuqishëm. Ky është misioni ynë. Dhe ky mision sot është më i rëndësishëm se në çdo kohë. Nuk mund të mbyllë ai kurrsesi afera të cilat i kanë kushtuar dhe u kushtojnë miliarda qytetarëve shqiptarë.
Ndaj dhe qytetarë dhe qytetare, të përgatitemi për kryengritjen e radhës më të fuqishme që ka njohur Shqipëria për t’i treguar kreut të organizatës kriminale se kurrë nuk pajtohemi ne me këtë veprimtari.”

Kryetari i Partisë Demokratike tha se përgatitjet për protestë do të fillojnë pas kësaj mbledhje të Grupit Parlamentar ndërsa datën do e shpallin shumë shpejt.

Duhet të ngrihemi në emër të të gjithë atyre shqiptarëve që nuk ngrihen dot nga frika.
Kështu është, historinë e bëjnë guximtarët, kjo është e vërteta në të gjitha rastet.
Ndaj dhe kryengritja tjetër duhet të jetë më fuqishmja që ka njohur Shqipëria.
Kjo do jetë përgjigja jonë ndaj dhunës shtazore që përdori Edi Rama me 17 prill.
Kjo duhet të jetë përgjigja jonë e vetme ndaj aktit të tij antikushtetues, ndaj mburojës që krijoi ai për vjedhjet e tij dhe të enturazhit të tij.
Ne nuk mund të pajtohemi kurrë ndaj dhe pas kësaj mbledhje, fillojmë menjëherë përgatitjet për protestën e ardhshme, datën e të cilës do e shpallim shumë shpejt. Nuk kemi të ndalur ne. Nuk na mposht askush. Por jo vetëm kaq. Jo vetëm këto.
Asnjëherë nga viti 1991 gjer sot nuk ka qenë më në rrezik e ardhmja e vendit aq sa është integrimi i Shqipërisë në BE.
Duhet të falënderoj përzemërsisht të gjithë ato vende, të cilat nuk u pajtuan me aktin antikushtetues, me mburojën që krijoi Edi Rama për vete dhe për Lubi Ballukun, por qëndruan në interesin më të mirë të qytetarëve shqiptarë.
Qëndruan sepse Shqipëria pa luftën kundër korrupsionit dhe pa funksionimin e shtetit ligjor, nuk ka të ardhme. Mirënjohje për ta.
Tani, në këtë rast, deklaroj këtu dhe konfirmoj se kjo forcë politike dhe ky grup parlamentar, objektiv më madhor të projektit për Shqipërinë, ka integrimin e saj në BE.
PD ka qenë lokomotivë e këtij procesi që në vitet e para gjer në vazhdim.
Por në këtë moment, duhet të sqarojmë se jemi dhe do jemi për një proces të bazuar në meritë dhe jo kurrë për një proces të bazuar në lobim korruptiv.
Procesi i bazuar në meritë është procesi që jetëson në Shqipëri normat, standardet, kriteret, të drejtat që gëzojnë qytetarët e vendeve anëtare të BE. E vërteta është, një tërësi normash, ligjesh, standardesh, të cilat i bëjnë qytetarët shqiptarë më të lirë, më të sigurt dhe më të mëkëmbur,” tha Kryetari i Partisë Demokratike, Sali Berisha, duke përfunduar:
“Ndaj dhe ne qëndrojmë të palëkundur në mbështetje të një procesi që bazohet në meritë.
Por ne dënojmë me forcën më të madhe praktikën lobiste mafioze të Edi Ramës në procesin e integrimit.
Hermetizmin e turpshëm sikur ky është një proces i tij, i familjes së tij dhe banditëve rreth tij dhe jo i qytetarëve shqiptarë.”