Pas takimit me U.D.Presidenten, kreu i KQZ: 7 Qershori, data më e favorshme

Pas takimit me Ushtruesen e Detyrës së Presidentes së Kosovës, Albulena Haxhiu, kreu i Komisionit Qendror të Zgjedhjeve, Kreshnik Radoniqi, tha se data 7 qershor mbetet më e favorshme për institucionin që ai drejton, në kuadër të organizimit të zgjedhjeve të parakohshme parlamentare.

“Gjykata Kushtetuese e ka përcaktuar që data e zgjedhjeve mund të jetë 31 maj ose 7 qershor. Për mendimin tonë është 7 qershori, por le t’i mbetet Presidentes të vendosë,” tha Kreshnik Radoniqi duke theksuar se data do të përcaktohet më vonë, ndërkaq ka kërkuar që të ketë sa më shumë kohë në mënyrë që KQZ të përgatitet për zgjedhjet e parakohshme.

Sa i përket buxhetit të zgjedhjeve, kreu i KQZ tha se parashikohet të jetë i njëjtë sikurse ai i zgjedhjeve të kaluara më 28 dhjetor 2025.

“Çështja e buxhetit është diskutuar në KQZ, po besoj do të jetë përafërsisht si në zgjedhjet e kaluara. Sa i përket datës kemi kërkuar sa më shumë kohë që të ketë për përgatitje.”

Ndryshe, pas dështimit të partisë në pushtet, Lëvizjes Vetëvendosje, për të gjetur me partitë tjera parlamentare një kandidat konsensual për Presidentin e Kosovës, në mesnatë ka skaduar afati i përcaktuar nga Gjykata Kushtetuese, dhe Kosova pritet të shkoj në zgjedhjet e treta parlamentare brenda 15 muajve!