Bordi i Transparencës rrit çmimin e naftës në 208 lekë

Bordi i Transparencës sot vendosi rritjen e çmimit të naftës nga 203 në 208 lekë, pas shtrenjtimit në bursa, ku treguesi Platts arriti në 1330 dollarë pë ton.

Çmimi i shitjes me pakicë i nënproduktit gazoil i standardit SSH EN 590 të jetë jo më shumë se 208 lekë/litri, ndërsa i shitjes me shumicë jo më shumë se 196 lekë/litër.
Çmimi i shitjes me pakicë i nënproduktit benzinë e standardit SSH EN të jetë jo më shumë se 185 lekë/litri,ndërsa i shitjes me shumicë jo më shumë se 173 lekë/litër.
Çmimet e caktuara nga Bordi do të hynë në fuqi sot datë 30 ora 13:00 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.
Tërheqim vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtëj vendimi.
Në rast të shkeljeve të konstatuara nga operatorë të ndryshëm do të vendoset pezullimi i aktivitetit.
Ministria e Ekonomisë dhe Inovacionit sëbashku me Ministrinë e Financave dhe Ministirinë e Infrastrukturës dhe Energjisë janë angazhuar të mbrojnë interesat e konsumatorëve shqiptarw dhe ruajtjes së parimeve të konkurencës së ndershme në treg.

SQARIM: Referuar Aktit Normativ nr. 1, Datë 3.4.2026 “Për një shtesë në ligjin nr. 61/2012, “Për akcizat në Republikën e Shqipërisë,” të ndryshuar, ku është parashikuar, se në rast se çmimi i shitjes me pakicë, për gazoili është më i lartë se 220 lek/litri, apo për benzinën është më i lartë se 200 lek/litri, zbatohet niveli 80% i akcizës. Bazuar në zbatimin e metodologjisë per llogaritjen e cmimeve tavan te shitjes me pakice, çmimet janë nën kufirin e Aktit Normativ nr. 1, datë 3.4.2026, dhe për rrjedhojë niveli i akcizës do të zbatohet i plotë, 100%.

Shoqata e Hidorkarbureve: Ndërhyrjet e Bordit më shumë destabilizojnë se rregullojnë tregun

Që nga 25 marsi, kur u riaktivizua nga qeveria Bordi i Transparencës për Hidrokarbureve, Bordi është mbledhur 15 herë për të fiksuar çmimet e karburanteve. Ndërsa ndërhyrja e parë, kur çmimi u ul nga 2014 në 203 lekë, doli blof, për shkak se importuesit u ankuan se çmimi është nën kosto dhe paralajmëruan bllokim të furnizimit me naftë në vend, më pas nuk ka pasur kundërshtime publike.

Por, Shoqata e Shoqërive të Hidrokarbureve thotë për Monitor se këto ndërhyrje të shpeshta nuk lënë asnjë mundësi që të ketë stabilitet çmimi.

“Pas rritjes së çmimeve mungesa e stabilitetit është gjëja më e keqe, pasi nuk lejon që kompanitë të marrin përsipër rreziqe dhe të mbyllin çmime ndonjë ditë kur ka rënie, ndërsa në rast rritjeje tregu do të amortizonte duke kombinuar blerjet më të ulëta me ato më të larta. Në këto raste çmimi lëviz plus, ose minus ku rritja ose ulja bëhet tendencë stabël dhe si rrjedhojë luhatjet do jenë më të pakta.

Në kushtet kur vendimet i merr Bordi, asnjë shitës me pakicë nuk guxon të blejë nga grosistët më shumë se nevoja ditore.  Gjëja më qesharake është që tani nafta është 203 lekë dhe Bordi del dhe njofton që  pas 5 orësh do jetë 208 lekë.

Veç të tjerash kjo na ka krijuar përplasje me klientët që vijnë protestojnë pse nuk më the që do rritet, të kisha mbushur serberatorin dhe e kundërta pse e mbusha e nuk me the se do ulej mbas 10 minutash”, thotë Luigj Aliaj nga Shoqata. Ai shton se kjo është një situatë tragji-komike e vërtetë.

“Do ti lutesha kujtdo të gjejë një rast si ky kaq qesharak në gjithë globin bashke me zbritjen në akcizë kur shkon 220 e ulin,  kur është 219,5. Jo; në vend që të thonë për 3-4 muaj akciza ulet 5, 7 apo 8 lekë apo sa te duan. Jemi në situatën më qesharake qe nuk ka rast më unikal në botë”.

Aliaj shton se situata po bëhet problematike. “Pikat që janë  jashtë kontrollit të grosisteve të gjitha po shkojnë në faliment dhe detyrohen t’i dorëzojnë tek shumica. e pastaj thonë treg i përqendruar”!

Ndërkohë, qeveria nga ana e saj e ka aktivizuar vetëm 5 ditë masën për uljen me 20% të akcizës, nëse çmimi rritet mbi 220 lekë. Në kontrast, rajoni, sidomos Maqedonia e Veriut, Serbia, Mali i Zi kanë marrë masa për të lehtësuar barrën fiskale mbi karburantet.

Shqipëria, ndonëse ka barrën më të lartë mbi karburantet, me taksat që rëndojnë më shumë se gjysmën e çmimit, ia ka kaluar të gjithë barrën shtesë konsumatorëve, duke i detyruar shumë prej këtyre të furnizohen në rajon./Monitor/