SHBA paralajmëron tërheqjen e trupave, reagon Gjermania

Pas paralajmërimit të Shteteve të Bashkuara për tërheqjen e 5.000 trupave amerikane nga Gjermania, Ministri gjerman i Mbrojtjes, Boris Pistorius, u ka bërë thirrje aleatëve evropianë të marrin përgjegjësi më të madhe për sigurinë e tyre.

Gjermania ka numrin më të madh të bazave ushtarake amerikane në Evropë, me rreth 35.000 trupa aktive, dhe shërben si një qendër kryesore trajnimi, raporton  Guardian.

Reagimi i ministrit gjerman
Boris Pistorius tha se prania e forcave amerikane në Evropë ishte “në interesin tonë dhe në interes të Shteteve të Bashkuara”. Megjithatë, ai shtoi:

“Ishte e parashikueshme që SHBA-të të tërhiqnin trupat nga Evropa, përfshirë Gjermaninë”.

Gjithësesi, Ministri gjerman i Mbrojtjes, Boris Pistorius, vlerëson se Gjermania është në rrugën e duhur në ndërmarrjen e hapave për të forcuar aftësitë mbrojtëse të vendit. Me këtë rast foli për zgjerimin e forcave të saj të armatosura, Bundeswehr, prokurimin më të shpejtë dhe më të gjerë të pajisjeve dhe ndërtimin e infrastrukturës.

Ndryshe, Pentagoni tha se tërheqja e trupave pritet të përfundon në gjashtë deri në dymbëdhjetë muajt e ardhshëm. Njoftimi erdhi mes përplasjeve publike midis Presidentit të SHBA, Donald Trump, dhe Kancelarit gjerman, Friedrich Merz, pasi udhëheqësi evropian tha se Irani kishte “poshtëruar” Shtetet e Bashkuara.