Referendumi në PD, Sali Berisha rikonfirmohet kryetar me 37.341 vota
Mirënjohje për të gjithë demokratët që më votëbesuan masivisht në krye të PD, tha Kryetari i Partisë Demokratike Sali Berisha, pasi KOKOE shpalli rikonfirmimin nga referendumi i sotëm ku morën pjesë 39.441 demokratë, 37.341 prej të cilëve votuan për Sali Berishën Kryetar, ndërsa shtoi se PD është një një familje e mbrujtur në palcë me diversitetin dhe standardin demokratik.
“Jam këtu para së gjithash për të shprehur mirënjohjen time më të pakufishme, nderimin më të thellë për të gjithë ata demokrate e demokratë, që sot votuan për riafirmimin tim në një votëbesim masiv në krye të Partisë Demokratike.
Një mirënjohje e veçantë shkon edhe për ata që votuan ndryshe.
I garantoj se vota e tyre ndryshe, apo kundër abstenim qoftë, do mbahet shënim në kuptimin e asaj që do bëj gjithçka për t’u dhënë përgjigje më të mirë atyre hezitimeve apo vërejtjeve për të cilat ata votuan kundër ose abstenuan.
Jemi një familje e mbrujtur në palcë, në qelizë me diversitetin, me standardin demokratik.
Shumë mirënjohje për ata qindra e qindra komisionerë në të katër anët e vendit, të cilët organizuan këtë proces shembullor në të gjitha degët e PD të Shqipërisë.
Falënderim të përzemërt për kryetarët, udhëheqësit politikë të qarqeve, kryetarëve të degëve në mbarë vendin, kryesitë dhe të gjithë ata që kontribuan në këtë proces,” tha Sali Berisha duke ju drejtuar demokratëve se me votën e tyre kanë lënë pa gjumë organizatën kriminale dhe kreun e saj, kanë tmerruar mafien e fjalës së lirë!
“Por unë sonte dua t’u them të gjithë këtyre dhjetëra mijëra demokratëve se për mua në të gjitha votimet nga shtatori i vitit 1991 gjer sot, ky është votimi më i rëndësishëm, më i jashtëzakonshëm sepse me këtë votëbesim ju vendosët të ecim të pamposhtur drejt qëllimeve tona madhore.
Të ecim të pamposhtur në përmbushjen e misionit të madh.
Imagjinoni ju, rreth 40 mijë gra dhe burra, djem dhe vajza politikë që ngrihen fuqishëm pas betejash të fuqishme për të vazhduar luftën tonë gjer në fitore të plotë.
Ky është një besim i madh i të gjithë ju që morët pjesë sot në votim, në forcën, në vizionin, në vendosmërinë e PD për të përmbysur diktaturën e dytë në Shqipëri.
Me votën tuaj ju keni lënë pa gjumë organizatën kriminale dhe kreun e saj.
Keni lënë pa gjumë kartelet e drogës dhe lidhjet e tyre me qeverinë.
Keni lënë pa gjumë mafien e tmerrshme të fjalës së lirë, e cila ka dy muaj që në një agresion mediatik të paparë bën gjithçka të përbaltë këtë proces më të fuqishmin që ka njohur PD në tërë ekzistencën e saj.
Bënë gjithçka t’u mashtrojnë, t’u dekurajojnë. Bënë gjithçka në zbatim të porosive të kreut të narkoshtetit,” tha Kryetari i rikonfirmuar i PD, Sali Berisha, duke përfunduar:
“Garantoj mafien qeveritare dhe vasalët e saj se lufta jonë është absolutisht e pakompromis.
Se fitorja jonë është e pashmangshme.
Se ky proces zgjedhor, që mbyllet sot, ka nxjerrë PD-në më të fortë se kurrë në ekzistencën e saj.”
Ndryshe, me përfundimin e procesit zgjedhor, KOKOE bëri të ditur se përmes një procesi transparent, të rregullt, të qetë, të monitoruar gjerësisht nga media, pa asnjë pengesë për të, si dhe të karakterizuar nga një pjesëmarrje masive e anëtarëve të Partisë Demokratike.
Nga përpunimi i të dhënave paraprake, pra kontaktet që kemi pasur me degët, 77 degët e Partisë Demokratike, ku votuan në 87 qendra votimi, nga rezultatet paraprake pra të procesit, kemi si më poshtë vijon.
Numri total i votave të numëruara pra, numri total i pjesëmarrësve është 39.441.
Nga këto, rezulton, vota të vlefshme 38.902.
Vota të pavlefshme 539.
Nga votat e vlefshme, vota pro kryetarit Sali Berisha 37.341.
Vota kundër 1.055.
Vota abstenim 506.
