Kupa e Botës 2026, dita e tretë me katër përballje

Sot është dita e tretë e Kupës së Botës dhe e para me katër përballje duke filluar nga ora 21:00 në mes Zvicrës dhe Katarit.

“Ne thjesht duam të japim maksimumin nesër. Duam të luajmë mirë për Zvicrën dhe për familjet tona. Nesër do ta hedhim hapin e parë të madh. Ky do të jetë Botërori ynë më i mirë. Jemi plotësisht të përgatitur. Jemi gati fizikisht dhe mendërisht,” tha kapiteni i Zvicrës, Granit Xhaka i cili merr pjesë në Botërorin e tij të katërt.

“Dy të tretat e lojtarëve të ekipit tim kanë luajtur tashmë në një turne të madh. Ne i kemi mësuar leksionet nga e kaluara. Tani, katër vjet më vonë, kemi më shumë përvojë. Gjërat i bëjmë më mirë,” tha trajneri i Zvicrës, Murat Yakin, i bindur se skuadra aktuale ka cilësinë e nevojshme për të bërë paraqitje të mira në Botëror aq më shumë kur nga kjo skuadër 17 lojtarë ishin pjesë edhe e Botërorit të kaluar ku kanë mësuar shumë. 

Në mesnatë është dhe ndeshja e ditës, në mes të Brazilit dhe Marokut, ku entuziastët e kombëtares braziliane do të konfirmojnë dhe përgatitjen e ekipit të tyre të zemrës për këtë Botëror nëse vërtetë këtë vit mund të arrijnë majat e futbollit botëror.

Brazili do të përballet sot me një detyrë të vështirë jo vetëm pse do të mungoj Neymar i lënduar por kemi të bëjmë me një ndeshje kundër gjysmëfinalistes së Kupës së Botës 2022, Marokut. Dhe, do të jetë ndeshja e vetme në fazën e grupeve që do të përballë dy ekipe që aktualisht renditen në 10 vendet e para të renditjes së FIFA-s, me Brazilin e gjashtë dhe Marokun e tetë.

Sa i përket Neymarit, duke konfirmuar një dëmtim në pulpë, trajneri i Brazilit, Carlo Ancelotti sqaroi: “Ai po punon shumë për t’u rikuperuar sa më shpejt të jetë e mundur. Shpresojmë që ai të jetë në gjendje të kthehet në stërvitje të plotë javën tjetër.”

Skocia dhe Haiti pritet të përballen në orën 03:00 të mëngjesit ndërsa dita e tretë përmbyllet me ndeshjen në mes të Australisë dhe Turqisë, në orën 6 të mëngjesit.

Ndonëse herë në mëngjes, përballja e Turqisë me Australinë pritet me shumë interes pasi kombëtarja turke paraqitet në Kupën e Botës pas 24 vjetësh.