Kosovë, procesi i numërimit të votave përfundoi, KQZ: Po presim përfundimin e afateve të ankesave

Pas përfundimit të rinumërimit të 185 vendvotimeve, zëdhënësi i KQZ të Kosovës, Valmir Elezi, tha se Komisioni Qendror i Zgjedhjeve është i gatshëm teknikisht që të shpall rezultatet përfundimtare të zgjedhjeve të 7 qershorit, por siç e kemi shpjeguar duhet të presim nëse do të ketë ankesa lidhur me administrimin e numërimit nga dita e fundit në QNR, e cila ishte dita e mërkurë e 17 qershorit, afat i cili ka përfunduar të premten dhe gjithashtu, KQZ do të presë nëse do të ketë ankesa lidhur me administrimin e rinumërimit i cili është përmbyllur të premten e 19 qershorit, ora 12:00.

“Para shpalljes së rezultateve, si zakonisht, KQZ do të kërkojë konfirmim nga PZAP nëse ka ndonjë ankesë që është në shqyrtim,” sqaroi Valmir Elezi. 

Ndryshe, nga rezultatet e përmbledhura, në zgjedhjet e 7 Qershorit ku pjesëmarra ishte vetëm 37.03%, Lëvizja Vetëvendosja ka marrë 382.869 vota ose 47.13% duke marrë përfundimisht 53 mandate deputeti, PDK 157.892 vota ose 19.44% me 22 mandate, LDK 135.567 vota ose 16.69% me 18 mandate, dhe AAK 54.729 vota ose 6.74%.

Ndërkohë partia “Srpska Lista” e mbështetur nga Presidenti i Serbisë, Aleksandar Vuçiç arriti të marrë 43.843 vota ose 5.40% me 9 mandate deputeti, partia “Za Slobodu Pravdu i Opstanak” e Nenad Rashiçit e mbështetur nga Kryeministri Albin Kurti arriti të marrë 5.447 vota ose 0.67% me 1 mandat, ndërsa partitë tjera joserbe që fituan nga një mandat janë: Koalicija Vakat, Inicita e Re Demokratike e Kosovës-IRDK, Nova Demokratska Stranka, Socijaldemokratska Unija – SDU, Partia Liberale Egjiptiane, Jedinstvena Gornska Partija, dhe, Partia Rime e Bashkuar e Kosovës – PREBK.