Prodhimet bujqësore, vezët dhe frutat me rritjen më të fortë të çmimeve

Tregu bujqësor vendas ka përjetuar një ecuri dinamike gjatë vitit të fundit, ku indeksi i përgjithshëm i çmimeve ka shënuar një rritje prej 1.0 për qind, duke reflektuar zhvillime të ndryshme mes nën sektorëve kryesorë të prodhimit bimor dhe blegtoral.

Sipas të dhënave zyrtare të Instat rritja nuk ka qenë uniforme, por është diktuar në mënyrë të ndjeshme nga disa kategori specifike që kanë ushtruar presionin më të madh mbi xhepat e konsumatorëve.

Në fokus të këtij shtrenjtimi janë vendosur produktet e blegtorisë, veçanërisht vezët, të cilat shënuan me rritjen më të lartë vjetore me  8.5 për qind në 2025 në krahasim me 2024. Kjo performancë ka ndikuar dukshëm në nëngrupin e produkteve të tjera blegtorale, i cili në total ka shënuar një rritje prej 5.2 për qind.

Sektori i blegtorisë prej vitesh po përjeton krizë më rënien e fortë të numrit të krerëve dhe rritjen e kostove të prodhimit.

Mungesa e subvencioneve nga ana tjetër bën që prodhimet vendase të dalin në treg me çmimeve shumë të larta duke konkurruar fort nga importin. Vitin e kaluar Eurostat e renditi Shqipërinë në vendin tretë, për çmimet e larta të bulmetit në tregjet e pakicës.

Gjithashtu, në sektorin e prodhimeve bimore rritjen me të fortë e shënuan prodhimet e drufrutoreve, të cilat kanë përjetuar një rritje mesatare prej 4.7 për qind.

Brenda kësaj kategorie, rritjet më të forta janë vërejtur te agrumet me 6.4 për qind, ullinjtë me 6.3 për qind, si dhe frutat në tërësi me 5.3 për qind.

Përtej këtyre rritjeve, sektori i verës shënoi gjithashtu një shtrenjtim vjetor prej 5.8 për qind, ndërsa vaji i ullirit ka shënuar një rritje prej 4.1 për qind.

Konsumatorët janë përballur me kosto më të larta për një gamë të gjerë të produkteve të konsumit të përditshëm, pavarësisht faktit se rritja mesatare e sektorit mbetet e moderuar.

Në anën tjetër tregu ka ofruar lehtësim në çmimet e disa produkteve. Për patatet çmimet shënuan rënie vjetore me 5.6 për qind, ndjekur nga shpendët me një ulje prej 3.7 për qind, si dhe produktet e qumështit të tjera me -2.7 për qind.

Analiza e këtyre të dhënave tregon se balanca mes ofertës dhe kërkesës mbetet delikate, ku faktorë të ndryshëm, që nga kostot e larta të inputeve për blegtorinë e deri te dinamikat sezonale të drufrutoreve, riformatuan çmimet në tregun vendas./Monitor/