Sot e shkarkoi nga detyra, ja vlerësimi që bënte Marku për Hajdarmatajn

Kryeprokurorja Arta Marku ka larguar nga detyra kryeprokurorin e Krimeve të Rënda, Besim Hajdarmatajn, duke e zëvendësuar me Donika Prelën, prokurore e Durrësit.

Hajdarmataj ishte prokurori që kishte në dorë hetimin e dosjes “Habilaj-Tahiri”.  Shkarkimi i tij erdhi vetëm një ditë pasi mori në pyetje ish-shoferin e ministrit Tahiri.

Pak muaj më parë Arta Marku mbështeti hetimet tërësore të Prokurorisë së Krimeve të Rënda për çdo çështje e në çdo nivel, kundër krimit dhe korrupsionit.

Marku i dha mbështetjen kreut të Prokurorisë së Krimeve të Rënda, Besim Hajdarmataj kur e priti në Prokurorinë e Përgjithshme paraditen më 22 janar 2018.

Marku kërkoi që Prokuroria e Krimeve të Rënda të vazhdojë pa hezitim dhe vendosmërisht punën dhe hetimet e filluara. Kryeprokurorja Marku garantoi bashkëpunim për hetime të vazhdueshme të çështjeve nga Prokuroria e Krimeve të Rënda ndaj kujtdo që shkel ligjin.

Prokuroria e Përgjithshme ritheksoi mbështetjen e nevojshme për çdo çështje, me çdo mjet dhe në çdo kohë, për të çuar përpara hetimet ndërsa pohoi se vë në dispozicion të Prokurorisë për Krimet e Rënda të gjitha burimet njerëzore dhe infrastrukturore për kryerjen me sukses të detyrave përputhshmërisht me ligjin.

Sot në më pak se 4 muaj nga kjo deklaratë, Marku vendosi zëvendësimin e Hajdarmatajt dhe emërimin e Donika Prelës, duke u shprehur: Arta Marku ka besim se ky ndryshim në drejtim do të sjellë si rezultat ndjekje penale më të shpejtë dhe më të efektshme të cështjeve me përparësi të lartë.

“Ndjekja penale e krimit dhe korrupsionit mbetet prioriteti më i lartë për Kryeprokuroren Marku”, thuhet në njoftimin zyrtar.