PDK dhe Aleanca kërkojnë vazhdimin e seancës, Dehari: Pa marrëveshje seancat mbeten të kota!

Deputetët e Partisë Demokratike të Kosovës. PDK, dhe Aleancës kanë vazhduar të qëndrojnë në sallën e Parlamentit të Kosovës, duke kërkuar nga kryesuesi Avni Dehari që të thërrasë vazhdimin e seancës për konstituimin e legjislaturës derisa kryesuesi Dehari ishte i prerë se pa marrëveshje politike, seancat e Kuvendit mbeten të kota

Gjatë qëndrimit në sallë, deputetë të PDK-së kanë mbajtur fjalime nga foltorja, duke insistuar se procesi i konstituimit duhet të përmbyllet dhe se tejkalimi i afatit kushtetues nuk e eliminon këtë obligim.

Deputeti i PDK-së, Arian Tahiri, tha se deputetët e kanë marrë mandatin nga qytetarët dhe se askush nuk mund t’ua mohojë ushtrimin e tij.

“Mandatin na e ka dhënë populli, nuk na e ka dhënë Albin Kurti dhe nuk mund të na i marrë”, deklaroi Tahiri.

Ai tha se prania e deputetëve në Parlament është një mënyrë për të shprehur qëndrimin e tyre dhe për të kërkuar funksionalizimin e institucioneve.

“Me qëllim që ta mbrojmë kushtetutshmërinë dhe ta funksionalizojmë Parlamentin, kemi ardhur këtu ku e kemi mandatin, për ta përcjellë qëndrimin tonë”, u shpreh ai.

Tahiri paralajmëroi se, në rast se mundësitë për zgjidhjen e situatës brenda Parlamentit shterojnë, partia e tij do të ndërmarrë hapa të tjerë politikë.

“Nëse shteren mundësitë brenda Kuvendit, do të jenë hapat tanë të tjerë të guximshëm për ta mbrojtur shtetin,” tha deputeti i PDK-së ndërsa i bëri thirrje për reagim qytetar lidhur me situatën politike dhe institucionale në vend.

Ndërkaq Besnik Tahiri i Aleancës tha se s’do të lejohet dhunimi i së drejtës së qytetarëve.

“Sovraniteti i takon popullit, i takon institucioneve të zgjedhura dhe ne që jemi këtu jemi të zgjedhur. Bllokimi i kuvendit është cenim i sovranitetit, rendi kushtetues dhe demokracisë. Nuk do të lejojmë në asnjë formë që të dhunohet e drejta e qytetarëve që me pas institucione,” tha Besnik Tahiri.

Ndërkohë, PDK i është drejtuar më herët me letër kryesuesit të Parlamentit, Avni Dehari, duke kërkuar që seanca të vazhdojë pa vonesa.

Sipas kësaj partie, moskonstituimi i Parlamentit brenda afatit të përcaktuar ka krijuar një situatë të rëndë kushtetuese, por kjo, sipas tyre, nuk e heq përgjegjësinë për përfundimin e procesit.

“Obligimi për përfundimin e procesit konstituiv mbetet dhe duhet të përmbushet pa vonesa të mëtejshme,” thuhet në letrën e PDK-së duke kërkuar që deputetëve të zgjedhur t’u mundësohet ushtrimi i mandatit dhe që seanca për konstituimin e Kuvendit të thirret sa më shpejt.

Dehari: Pa marrëveshje politike, seancat e Kuvendit mbeten të kota

Kryesuesi i seancës konstituive të Parlamentit, Avni Dehari, ka deklaruar se një marrëveshje politike ndërmjet partive parlamentare është rruga për formimin e institucioneve dhe shmangien e zgjedhjeve të reja.

Dehari ka rikujtuar se më 26 qershor 2025, Gjykata Kushtetuese kishte ritheksuar nevojën që Parlament të konstituohej brenda afatit prej 30 ditësh, duke sqaruar se afati fillonte të rridhte nga dita e shpalljes së aktgjykimit KO124/25.

“Kjo nënkuptonte që sipas aktgjykimit KO124/25, Kuvendi do duhej të konstituohej më së largu me 26 korrik 2025,” tha Dehari duke theksuar se edhe pas përfundimit të këtij afati, Parlamenti nuk ishte konstituuar.

“Të gjithë jemi dëshmitarë se konstituimi i Kuvendit nuk kishte ndodhur as pas afatit të ri 30-ditor të vendosur nga Gjykata Kushtetuese, pra deri me datën 26 korrik 2025.” është shprehur ai duke kritikuar qasjen e opozitës gjatë vitit të kaluar, duke thënë se thirrjeve për votimin e konstituimit u ishte përgjigjur me kërkesën për një marrëveshje politike.

“Sa herë që u kam bërë thirrje deputetëve të opozitës vitin e kaluar që të votonin për ta konstituuar Kuvendin e të mos tejkalohej afati kushtetues, përgjigja e tyre ka qenë se ‘nevojitet marrëveshje politike’,” tha Dehari, sipas të cilit, në atë kohë tejkalimi i afatit nuk ishte ngritur si problem, ndërsa Gjykata Kushtetuese, në aktgjykimet pasuese për çështjen e konstituimit, kishte kërkuar vazhdimin e përpjekjeve për konstituimin e Parlamentit.

“Asnjëherë nuk ishte problematizuar tejkalimi i këtij afati. Kurse nga vetë Gjykata Kushtetuese në aktgjykimet pasuese për çështjen e konstituimit, u kërkohej palëve të vazhdonin tentativat për konstituim pavarësisht tejkalimit të afatit, sepse nevoja për ta konstituuar Kuvendin i mbivendoset afatit,” tha ai duke rikujtuar gjithashtu se pas zgjedhjeve të 28 dhjetorit, partitë opozitare e kishin precizuar kërkesën e tyre për një marrëveshje politike para formimit të institucioneve.

“Kërkesa e partive opozitare u precizua edhe më tej pas zgjedhjeve të 28 dhjetorit, duke insistuar që marrëveshja politike duhet të bëhet para formimit të institucioneve, përndryshe shkojmë në zgjedhje,” ka deklaruar Dehari duke vlerësuar se thirrja e vazhdueshme e seancave pa një marrëveshje politike nuk do të prodhonte zgjidhje.

“Ne edhe mund të thërrasim seanca shterpë të cilat vetëm sa i irritojnë qytetarët, mirëpo përvoja nga dy legjislaturat e kaluara na ka mësuar që e vetmja mënyrë për institucione stabile dhe për të evituar zgjedhjet, është përmes një marrëveshjeje politike në mes të partive parlamentare.”

Në fund, Avni Dehari ka bërë të ditur se në momentin kur do të ketë sinjale për një marrëveshje politike që do të mundësonte formimin e institucioneve dhe shmangien e zgjedhjeve, vazhdimi i seancës konstituive do të ishte vetëm çështje formaliteti ndërsa përfundoi:

“Momentin e parë që kemi sinjale për marrëveshje politike që siguron formimin e të gjitha institucioneve dhe evitimin e zgjedhjeve, ashtu siç e ka kërkuar edhe vetë Gjykata Kushtetuese në aktgjykimet e vitit të kaluar, pra që palët të merren vesh në vend se të ketë tentativa pa rezultat, thirrja e vazhdimit të seancës konstituive bëhet formalitet ceremonial.”