AVONET dhe 13 OJQ kërkojnë sqarim nga Gjykata Kushtetuese për konstituimin e Parlamentit
AVONET dhe 13 organizata të tjera të shoqërisë civile i janë drejtuar Gjykatës Kushtetuese të Kosovës me kërkesë për të vlerësuar zbatimin e Aktgjykimit KO124/25, lidhur me afatin për konstituimin e Parlamentit ndërkohë sot u krijua një kaos në mes të partive parlamentare shqiptare, ku pati dhe konfrontime fizike.
Në deklaratën për media, AVONET thotë se kërkesa është dorëzuar pas zhvillimeve të fundit në procesin e konstituimit të Parlamentit të dalë nga zgjedhjet e 7 qershorit 2026.
Sipas organizatave, afati 30 ditor për konstituimin e Parlamentit ka përfunduar më 7 gusht, ndërsa seanca konstituive e 6 gushtit nuk ka përfunduar me zgjedhjen e Kryetarit dhe Nënkryetarëve të Parlamentit.
“Mbajtja e një seance që nuk përfundon me zgjedhjen e Kryetarit dhe Nënkryetarëve të Parlamentit nuk nënkupton se Parlamenti është konstituuar”, thuhet në deklaratë, duke iu referuar Aktgjykimit KO124/25 të Gjykatës Kushtetuese.
AVONET thekson se vazhdimi i seancës ishte caktuar për 8 gusht, pra pas përfundimit të afatit 30-ditor.
Për këtë arsye, organizatat kanë kërkuar nga Gjykata Kushtetuese të vlerësojë nëse Aktgjykimi KO124/25 është zbatuar në përputhje me përcaktimet e tij dhe brenda afatit të përcaktuar.
Kërkesa është bazuar në Rregullin 60 të Rregullores së Punës së Gjykatës Kushtetuese, i cili përcakton procedurën në rastet e pretendimeve për moszbatim të një vendimi të Gjykatës.
Në rast se konstatohet moszbatim, AVONET dhe organizatat nënshkruese kërkojnë që Gjykata të ndërmarrë veprimet e parapara me rregullore, përfshirë nxjerrjen e aktvendimit për moszbatim apo mospërmbarim dhe hapat e tjerë që i konsideron të nevojshëm.
Sipas AVONET-it, çështja ka rëndësi të veçantë për funksionimin e institucioneve të zgjedhura dhe respektimin e rendit kushtetues.
“Qëllimi është të sigurohet qartësi juridike dhe institucionale lidhur me procesin e konstituimit të Parlamentit dhe respektimin e vendimeve të Gjykatës Kushtetuese,” thuhet në deklaratën e AVONET dhe 13 organizatave tjera të shoqërisë civile.
Ndryshe, pas certifikimit të rezultateve përfundimtare të zgjedhjeve parlamentare më 8 korrik dhe bazuar në Vendimin e Gjykatës Kushtetuese kishte afat prej 30 ditësh për konstituimin e Parlamentit ose deri më 7 gusht, seanca konstituive e Parlamentit u hap më 6 gusht, por nuk përfundoi me zgjedhjen e Kryetarit dhe Nënkryetarëve të Parlamentit, pasi Kryetari LVV, Albin Kurti, kërkoi kohë shtesë për arritjen e një Marrëveshje Politike.
Në 7 Gusht nuk u mbajtë seanca fare ndërsa në seancën e 8 gushtit ndonëse kishte kaluar afati, kryesuesi i seancës konstituive sërish i dha kohë Albin Kurtit për arritur e Marrëveshjes Politike për zgjidhjen e Presidentit.
Dhe, derisa Lëvizja Vetëvendosje vazhdon të mbështes idenë për një marrëveshje politike për zgjedhjen e Presidentit para vazhdimit të procesit, tensionet në mes partive parlamentar sot kanë arritur kulmin në Kuvend, ku deputetët tashmë të betuar e gjetën zgjidhjen te dhuna dhe jo ligjshmëria!
