Pasi edhe LDK hoqi dorë nga negociatat, Kurti: Të diskutojmë emrat për Presidentin!
Kryeministri në detyrë i Kosovës, Albin Kurti, tha sot se partitë politike duhet të fillojnë diskutimet edhe për emrat konkretë të kandidatëve për presidentin e ardhshëm, me qëllim që të arrihet një marrëveshje dhe të shmangen zgjedhjet e reja.
“Duhet të fillojmë të flasim edhe me emra, sepse po humbim shumë kohë, por më së shumti humbim duke shkuar në zgjedhje,” tha Albin Kurti duke shtuar se presidenti i ardhshëm duhet të jetë konsensual, gjithëpërfshirës dhe të ketë mbështetje sa më të gjerë në Kuvend dhe në mesin e qytetarëve.
Albin Kurti tha se mbrëmë u ka shkruar kryetarëve të PDK-së, LDK-së dhe Aleancës, duke u kërkuar takim për të diskutuar për presidentin.
“Duam që për këtë të merremi vesh paraprakisht në mënyrë që të evitojmë zgjedhjet,” tha ai duke vlerësuar se në Kosovë ka me dhjetëra personalitete nga jeta akademike, politike dhe shoqërore, përfshirë persona që kanë kontribuar në luftë dhe në shtetndërtim, që mund të konsiderohen për këtë post.
Deklaratat e Kurtit vijnë një ditë pasi LDK-ja njoftoi se tërhiqet nga negociatat për poste me LVV-në dhe se nuk kërkon asnjë pozitë institucionale, por do të votojë për një figurë jopartiake për president.
Ndërkohë, PDK dhe AAK qëndruan edhe sot në sallën e Parlamentit, duke kërkuar vazhdimin e seancës konstituive, ndonëse për sot nuk është thirrur seancë.
Ata po kërkojnë që të vazhdojë seanca konstituive e Parlament, e cila ka mbetur e ndërprerë në kuadër të përpjekjeve për konstituimin e legjislaturës së re.
“LVV e ka kaluar një kufi që nuk është dashur ta kalojnë kurrë. Ata qëllimshëm e kanë shkelur afatin kushtetues për konstituimin e Parlamentit,” tha Kryetari i PDK-së, Bedri Hamza, në foltoren e Parlamentit.
PDK dhe Aleanca kanë qëndruar në Kuvend edhe gjatë ditëve të kaluara, duke kërkuar që puna e Parlamentit të vazhdojë, ndërsa përplasjet me deputetët e Lëvizjes Vetëvendosje janë shoqëruar edhe me tensione në sallë.
Në anën tjetër, Lëvizja Vetëvendosje ka insistuar se para vazhdimit të procedurave për konstituimin e Parlamentit duhet të arrihet një marrëveshje politike për zgjedhjen e presidentit të ardhshëm.
Kriza institucionale në Kosovë po vazhdon prej përplasjes mbi mënyrën se si duhet të procedohet me konstituimin e Parlamentit dhe zgjedhjen e presidentit.
Pas zgjedhjeve të 7 qershorit, LVV doli partia e parë me 53 deputetë, PDK-ja me 22, LDK-ja me 18 dhe AAK-ja me shtatë.
Zgjedhjet e qershorit u shkaktuan pikërisht për çështjen e presidentit, pasi palët nuk arritën konsensus, pasi Vjosa Osmanit i përfundoi mandati pesëvjeçar në krye të shtetit në prill.
LVV e Kurtit ka fituar mandate të mjaftueshme për të konstituuar Parlamentin dhe për të votuar Qeverinë e re, duke llogaritur edhe në votat e partive të minoriteteve joshumicë.
Megjithatë, për zgjedhjen e presidentit nevojitet prania e 80 deputetëve në Parlamentin me 120 vende që votimi për presidentin e Kosovës të jetë i vlefshëm./RFE/
