Gërmimet në Kalludër drejt fundit, pasojnë analizat ADN
Kushtrim Gara nga Komisioni Qeveritar për Persona të Zhdukur, ka deklaruar sot se procesi i gërmimit, vlerësimit dhe zhvarrosjes së mbetjeve mortore në Kalludër të Zubin Potokut pritet të përfundojë brenda kësaj jave, dhe, pas përfundimit të punimeve në terren, procesi do të vazhdojë me shqyrtimin e mbetjeve mortore dhe analizat e ADN-së, të cilat do të realizohen në bashkëpunim me partnerët ndërkombëtarë.
“Në kuptimin e gërmimit, vlerësimit dhe zhvarrosjes së mbetjeve mortore është çështje ditësh, në qoftë se jo sot, nesër, pra gjatë kësaj jave. Mirëpo, në kuptimin e përfundimit në tërësi si proces, pasi është faza e shqyrtimit të mbetjeve, pastaj është çështja e analizave të ADN-së, e cila është çështje e testimit në laborator që kryhet bashkë me partnerët ndërkombëtarë do të marrë pak kohë,” tha Kushtim Gara duke shtuar se institucionet e Kosovës do ta trajtojnë me prioritet të gjitha çështjet që janë në kompetencën e tyre dhe që mund të realizohen nga ekspertët vendorë.
“Por, ajo që është e rëndësishme, çdo gjë që është brenda mundësive, kompetencave dhe në duart e ekspertëve të institucioneve të Kosovës do të adresohet me prioritet dhe brenda afateve optimale,” tha ai.
Pas përfundimit të analizave dhe identifikimit eventual të mbetjeve, tha Kushtrim Gara, Komisioni Qeveritar për Persona të Zhdukur do t’i njoftojë familjet e viktimave, dhe do të jenë familjet qq do të kenë të drejtën të vendosin për datën dhe vendin e rivarrimit, si dhe nëse dëshirojnë që informacioni të bëhet publik.
Ndryshe, kjo është java e katërt e gërmimeve në Kalludër dhe sipas garës, aktualisht puna është e përqendruar në lokacionin e tretë të varrezës masive.
Gërmimet në Kalludër të Zubin Potokut po zhvillohen pas dyshimeve se në këtë zonë mund të ketë lokacione me mbetje mortore të personave të zhdukur gjatë luftës në Kosovë. Dyshohet se mbetjet mund t’u përkasin grupit prej 23 personash të njohur si “Intelektualët e Mitrovicës”, të zhdukur gjatë luftës së vitit 1999, fati i të cilëve ende nuk dihet.
