Këshilli Gjyqësor i Kosovës refuzon kthimin e gjyqtarëve dhe stafit serb të dorëhequr

Këshilli Gjyqësor i Kosovës, KGJK, ka refuzuar kërkesën e gjyqtarëve dhe stafit administrativ nga komuniteti serb për tërheqjen e dorëheqjeve dhe rikthimin në sistemin gjyqësor të Kosovës.

Vendimi është marrë sot ku propozimi për refuzimin e kërkesave është miratuar me nëntë vota për, një kundër dhe një abstenim.

Në këtë mënyrë, KGJK ka refuzuar kërkesat për kthimin në detyrë të gjyqtarëve dhe stafit serb, të cilët kishin dhënë dorëheqje nga sistemi gjyqësor.

Ndryshe, Ushtruesja e Detyrës së Presidentes së Kosovës, Albulena Haxhiu, kishte kërkuar që KGJK t’i trajtonte dorëheqjet e gjyqtarëve serbë, të dorëzuara në fund të vitit 2022, si dhe të njoftonte gjyqtarët lidhur me mundësinë e tërheqjes së tyre.

Vendimi i KGJK vjen pas shqyrtimit të kërkesave për rikthimin e tyre në sistemin gjyqësor.