Në Shqipëri çmimet rriten 5.2 herë më shumë se në BE, Berisha: Indiferenca e Edi Ramës është çnjerëzore!

Mosreagimin e Edi Ramës edhe pas raportimit të Eurostat se çmimet e ushqimeve bazë në Shqipëri janë rritur 5.2 herë më shumë se mesatarja e BE-së, ndërkohë Greqia vendosi të ulë koston e çmimeve deri në 30 për qind, Kryetari i Partisë Demokratike, Sali Berisha, e vlerëson indiferencë çnjerëzore të Kryeministrit Rama.

“Kriza e thellë politike e vendit po shoqërohet nga një krizë e thellë ekonomike.

Qeveria e vendit fqinj, Greqia, ka vendosur të ulë me koston nga 5 për qind në 30 për qind të çmimeve të 1600 artikujve.
Çmimeve të ushqimeve bazë, çmimeve të të gjitha mjeteve shkollore për fëmijët, çmimeve me përdorim të gjerë nga konsumatorët në shtëpi.
Pra, Greqia, ndonëse qytetarët e saj kanë një rrogë mesatare katër herë më të madhe se qytetarët shqiptarë dhe çmime qartësisht më të ulëta se në Shqipëri, përsëri konsideron çmimet tejet munduese për qytetarët dhe bën një ndërhyrje shumë të rëndësishme për lehtësimin e qytetarëve të saj.
Ndërkohë, çmimet në Shqipëri, sipas statistikave më të fundit, çmimet e ushqimeve në Shqipëri u rritën këtë vit 5 herë më shumë se sa mesatarja e vendeve të BE.
Dhe qeveria ka zero reagim.
Çmimet pra janë rritur këtë vit krahasuar me rritjen mesataren të çmimeve të ushqimeve në BE, 5.2 herë më shumë.
Dhe qeveria ndërmerr zero veprime.
Këto të dhëna, së bashku me të dhënat e tjera, të cilat faktojnë se 30 për qind e shqiptarëve kërcënohen nga uria, janë kambanat e alarmit më të trishtë që bien në këtë vend.
Indiferenca e Edi Ramës, qeverisë së tij ndaj kësaj situate, tejkalon qëndrimet do të thosha më çnjerëzore,” tha Sali Berisha ndërsa propozon të subvencionohen të gjitha shpenzimet për shkollën, të hiqet TVSH për ushqimet dhe të vendoset minimumi jetik.

“Për PD-në është jetike heqja e menjëhershme e TVSH-së për ushqimet.
Subvencionimi i plotë i të gjitha shpenzimeve për shkollën bazuar në parimin e arsimit falas.
Me Kushtetutë, arsimi është falas.
Vendosja e menjëhershme e minimumit jetik.
Këto masa ne i konsiderojmë masat më të domosdoshme për t’iu kundërvënë lakut të urisë, mjerimit dhe varfërisë që po shtrëngohet çdo ditë e më shumë në familjet shqiptare në nevojë,” tha Kryetari i Partisë Demokratike, Sali Berisha, duke përfunduar:

“Përkundrejt këtyre masave, narkoqeveria ofroi njëherë Besën, dhe pasi i doli kallp Besa, tani Pasqyrën, një mashtrim të turpshëm të dytë duke dëshmuar se nuk jeton në këtë realitet, por jeton tërësisht në kullën e fildishtë të pushtetit të saj dhe nuk ka asnjë interes të përbashkët me qytetarët, përveç interesave të pasurimit të qytetarëve.”