Pas mbrëmjes së frikshme në luftë me flakët, nisin ndërhyrjet nga ajri në Himarë
Pas luftës me flakët gjatë mbrëmjes së djeshme në territorin e Bashkisë Himarë zjarri vijon të jetë aktiv, ndërkohë mëngjesin e sotëm ka nisur edhe ndërhyrja nga ajri.
Helikopterët po hedhin ujë mbi vatrat e zjarrit, në përpjekje për të frenuar përhapjen e flakëve dhe izoluar vatrat aktive, ndërsa në terren vijojnë të jenë të angazhuara Forcat e Armatosura, së bashku me forca të shumta zjarrfikëse të ardhura nga Himara, Delvina, Vlora dhe Saranda.
Ndërkohë situata e zjarreve vijon të mbetet problematike edhe në zonën e Levanit, ndërsa forcat e emergjencave po punojnë për vënien nën kontroll të vatrave. Kreu i Emergjencave Civile, Haki Çako, tha se për shuarjen e flakëve është ndërhyrë nga ajri me dy helikopterë dhe një avion Air Tractor.
Mbrëmjen e së shtunës Himara përjetoi çaste tmerri ku një zjarr masiv shpërtheu në kodrën e qytetit, mbi lagjen “1 Maji”, duke marrë përmasa apokaliptike. Flakët u përhapën deri në pjesën e poshtme të qytetit, ku raportohet se u dogjën 7 banesa, për rrjedhojë Bashkia Himarë dha urdhër të menjëhershëm evakuimi për banorët dhe turistët e shumtë. Veç zjarrfikësve që po përpiqeshin për izolimin e flakëve, në terren shkuan edhe forca të shumta policie, të cilët u angazhuam për evakuimin e banorëve dhe turistëve, duke bërë vendosjen e tyre pranë vijës bregdetare, për të qëndruar më të sigurt.
Pavarësisht situatës së rënduar nga flakët nuk ishte e mundur ndërhyrja nga ajri me helikopter apo avion zjarrshues, pasi këto mjete emergjence nuk ngrihen natën sepse nuk ka pilotë të specializuar për këto lloj operacionesh.
Për izolimin e flakëve u angazhuan nga 1 automjet zjarrfikës me efektivë të Fierit, Tiranës, Peqinit, Librazhdit, Tepelenës, Himarës, Vlorës, Finiqit, Delvinës, Sarandës, Gjirokastrës e Dropullit. Në ndihmë shkuan edhe forca vullnetare, ndërsa nga spitali nuk raportohet për asnjë qytetar apo efektiv të lënduar. Ende nuk dihet shkaku i rënies së zjarrit në kodrat e Himarës, ndërsa situata ngre shqetësim serioz për sigurinë e qytetarëve dhe turistëve që ende vijojnë ta frekuentojnë masivisht bregdetin e saj. Operacioni për izolimin e zjarrit me helikopter ka nisur këtë mëngjes.
Ndërsa në Levan ku situata vijon të jetë gjithashtu problematike me zjarret, tre persona kanë pësuar asfiksi dhe kanë marrë ndihmë mjekësore, ndërsa raportohet edhe për djegien e një banese të braktisur.
Forcat zjarrfikëse dhe strukturat e emergjencave vijojnë punën në terren, ndërsa ndërhyrja nga ajri po përdoret në zonat ku terreni dhe përhapja e flakëve e vështirësojnë operacionin.
Kreu i Emergjencave Civile, Haki Çako, tha se prioriteti kryesor i strukturave të emergjencave është mbrojtja dhe shpëtimi i jetës së njerëzve, ndërsa po punohet për të parandaluar përhapjen e flakëve drejt zonave të banuara. Me këtë rast ai ka kërkuar nga organet kompetente që të merren masa të ashpra ndaj autorëve të zjarrvënieve të qëllimshme, duke bërë thirrje për dënimin maksimal për personat që shkaktojnë zjarre me dashje.
Ndërkohë zjarri vijon të përfshijë një masiv me pisha në fshatin Frrakull, ndërsa situata në terren mbetet e vështirë për shkak të përhapjes së flakëve dhe pranisë së lartë të tymit.
Vatra e zjarrit vijon edhe në drejtim të fshatit Peshtan, në një zonë ku terreni nuk lejon ndërhyrjen e mjeteve zjarrfikëse.
Në terren janë angazhuar rreth 90 trupa të Forcave të Armatosura nga repartet e Poshnjës dhe Tiranës, ndërsa operacioni mbështetet edhe nga 7 mjete zjarrfikëse dhe efektivët.
