Shpërthim në një depo armësh në Bullgari, EMCO në shënjestër të rusëve
Një shpërthim i fuqishëm shkaktoi zjarr në një depo armësh në Bullgarinë qendrore gjatë natës, raportuan mediat dhe zyrtarët vendas. Ky ishte shpërthimi i dytë në një strukturë ushtarake në javët e fundit.
Nuk pati raportime për të lënduar në flakët pranë fshatit Tsareva Livada, dhe pamjet video lokale treguan flakë që ndriçonin qiellin e natës.
“Për momentin, zjarri ka përfshirë pjesën e magazinës së fabrikës dhe po përhapet nga një depo në tjetrën,” u tha gazetarëve guvernatorja rajonale e Gabrovos, Kristina Sidorova.
Në të kaluarën, EMCO ishte në shënjestër të operativëve rusë
Duke cituar një burim në EMCO, mediat vendase raportuan se zjarri shpërtheu në një vend të operuar nga kompania dhe se e njëjta kompani pësoi një shpërthim në një strukturë tjetër muajin e kaluar. EMCO nuk komentoi për rastin, raporton Agjencia e lajmeve Reuters.
Kompania EMCO drejtohet nga tregtari bullgar i armëve Emilian Gebrev, objektet e të cilit janë shënjestruar nga operativët rusë në të kaluarën, sipas prokurorëve bullgarë.
Në vitin 2024, Bullgaria lëshoi urdhër-arreste për gjashtë shtetas rusë të akuzuar për përfshirje në shkatërrimin e depove të armëve të EMCO-së që ruanin municione të destinuara për eksport në Ukrainë dhe Gjeorgji midis viteve 2011 dhe 2020.
Prokurorët thanë në atë kohë se kishte dyshime të arsyeshme se shpërthimet në Bullgari, përpjekja për helmim të Gebrev në vitin 2015 dhe shpërthimet në depot e municioneve në Republikën Çeke në vitin 2014 ishin të lidhura. Moska i ka mohuar akuzat.
