Lëvizjet në kufijtë tokësorë u rritën, Morina kryeson, bie fluksi në Muriqan

Fluksi i pasagjerëve në pikat kufitare tokësore të Shqipërisë ka vijuar të rritet gjatë vitit 2025.

Pika kufitare e Morinës vijon të mbetet pika më e rëndësishme për lëvizjen e pasagjerëve, ndërsa rritja më e fortë është regjistruar në Bllatë. Nga ana tjetër një nga pikat kryesore të lidhjes me Malin e Zi, ka shënuar rënie të ndjeshme.

Sipas të dhënave zyrtare të Instatpër lëvizjen e pasagjerëve në pikat kufitare tokësore, gjatë vitit 2025 janë regjistruar rreth 14.2 milionë hyrje, me një rritje prej 5.5 për qind krahasuar me vitin e mëparshëm. Ndërkohë, daljet arritën në 14.22 milionë, duke u zgjeruar me 7.5 për qind.

Në total, në kufijtë tokësorë u regjistruan 28.4 milionë lëvizje hyrëse dhe dalëse, me rritje prej 6.5 për qind krahasuar me vitin 2024. Në raport me vitin 2023, kur u regjistruan rreth 24.8 milionë lëvizje, rritja arrin në 14.7 për qind. Të dhënat tregojnë se daljet janë rritur me ritëm më të shpejtë sesa hyrjet.

Morina, pika kryesore kufitare me Kosovën, vijon të dominojë trafikun tokësor të pasagjerëve. Gjatë vitit 2025, në këtë pikë u regjistruan 5.52 milionë hyrje dhe 5.68 milionë dalje, ose rreth 11.2 milionë lëvizje në total. Në Morinë realizohet 39.4 për qind e të gjitha lëvizjeve në kufijtë tokësorë të vendit.

Krahasuar me vitin 2024, numri i hyrjeve në Morinë u rrit me 5.3 për qind, ndërsa daljet me 6.6 për qind. Pika kufitare e Morinit është porta kryesore e qarkullimit tokësor mes Shqipërisë dhe Kosovës dhe gjithashtu shërben edhe si tranzit për udhëtimet drejt Tropojës dhe anasjelltas.

Ndër pikat kufitare me rritjen më të lartë spikat Bllada, në kufirin me Maqedoninë e Veriut, ku hyrjet u rriten me 55.5 për qind ne 2025 dhe daljet më 52 për qind. Më pas me rritjen më të fortë të fluksit vjen Morina, ku hyrjet u shtuan me 26.3 për qind, ndërsa daljet u rritën me 82.9 për qind.

Në kahun e kundërt, Muriqani në kufi me Malin e Zi regjistroi një rënie të konsiderueshme të fluksit. Me një tkurrje prej 11.6 për qind me hyrjet dhe me 11.7 për qind për daljet. Rënia në këtë pikë mund të lidhet me ndryshime në itineraret e udhëtimit apo zhvendosjen e flukseve drejt pikave të tjera, megjithëse të dhënat nuk japin informacion të mjaftueshëm për të përcaktuar shkaqet.

Pikat kryesore kufitare me Greqinë kanë regjistruar përgjithësisht rritje të lëvizjeve gjatë vitit 2025.Në të gjitha pikat kufitare trafiku i lëvizje shënoi 5.1 milionë udhëtare më 2025 me rritje vjetore 9 për qind. Në Kakavijë, hyrjet shënuan rritje vjetore me 10.4 për qind në 2025. Edhe në Kapshticë, hyrjet u rritën me 8.4 për qind, duke arritur në 1.04 milionë, ndërsa daljet u zgjeruan me 9.3 për qind. Tendencë pozitive është regjistruar edhe në Qafë Botë, ku hyrjet u shtuan me 6.9 për qind, dhe në Tri Urat, me rritje prej 14.8 për qind.

Ndërkohë, në kufirin me Maqedoninë e Veriut, përveç rritjes së fortë në Blladë, një ecuri të kundërt ka pasur Qafë Thana. Në këtë pikë, hyrjet u pakësuan me 4 për qind, nga 1.22 milionë në 1.17 milionë, ndërsa daljet ranë me 1.6 për qind./B.Hoxha