“Zekaj”, ministri Brendshëm prezanton gjetjet e raportit, pezullohen 19 policë! Jep dorëheqje Drejtori i Policisë

Ministri i Punëve të Brendshme i Kosovës, Xhelal Sveçla, së bashku me ministren e Drejtësisë, Donika Gërvalla, kanë prezantuar sot gjetjet e raportit për trajtimin institucional të rastit “Arlinda Zekaj”.

Ndërkohë Kryeministri i Kosovës, Albin Kurti, e ka liruar nga detyra Drejtorin e Përgjithshëm të Policisë, Gazmend Hoxha, pasi ka pranuar kërkesën e tij për dorëheqje.

Ministri Sveçla bëri të ditur se, përmes Inspektoratit Policor të Kosovës, gjatë ditëve të fundit janë verifikuar të gjitha veprimet dhe mosveprimet e Policisë së Kosovës lidhur me raportimet dhe kërkesat për mbrojtjen e Arlindës.

Ai njoftoi se, bazuar në gjetjet e raportit, janë pezulluar 19 zyrtarë policorë, përfshirë Drejtorin rajonal të Policisë në Pejë, shefin e Hetimeve Rajonale, komandantin dhe zëvendëskomandantin e Stacionit Policor në Pejë, si dhe zyrtarë të tjerë nga zinxhiri komandues dhe sektori i hetimeve.

“Shkeljet e identifikuara përfshijnë mosekszekutimin e urdhrit të parë për mbrojtje, vonesa në ekzekutimin e urdhrit të dytë për mbrojtje, si dhe mospërfilljen e kërkesës për rivlerësimin e rrezikut,” tha Sveçla duke vlerësuar se raporti evidenton shkelje serioze nga disa zyrtarë policorë dhe pjesëtarë të zinxhirit komandues në Pejë, ndërsa gjetjet pritet të trajtohen dhe vlerësohen edhe nga Prokuroria.

Ministri bëri të ditur se raportin mbi veprimet e Policisë së Kosovës dhe Inspektoratit Policor ia kishte dorëzuar kryeministrit Albin Kurti, ndërsa theksoi se hetimet e mëtejshme mund të nxjerrin në pah edhe fakte dhe përgjegjësi të tjera.

Pezullimet, sipas tij, nuk janë të mjaftueshme pa një hetim të plotë dhe përcaktim të përgjegjësisë për secilin zyrtar që ka neglizhuar detyrat e tij.

“Asnjë uniformë, asnjë gradë dhe asnjë pozitë komanduese nuk mund të shërbejë si mburojë ndaj përgjegjësisë,” u shpreh ministri Sveçla duke theksuar se Arlinda Zekaj kishte kërkuar mbrojtje dhe kishte paralajmëruar për rrezikun ndaj jetës së saj, ndërsa institucionet kishin pasur detyrim të vepronin në kohë për të garantuar sigurinë e saj.

“Arlinda kishte kërkuar mbrojtje. Institucionet kishin detyrimin të vepronin,” tha Sveçla duke bërë të ditur se me kërkesë të kryeministrit Albin Kurti, është përpiluar një raport i veçantë për rastet aktive me rrezikshmëri të lartë që monitorohen nga Policia e Kosovës.

Janë identifikuar, tha Sveçla, 155 raste aktive me rrezikshmëri të lartë, për të cilat Policia ka raportuar mbi veprimet dhe masat e ndërmarra. Po ashtu, janë përfshirë edhe rastet e vlerësuara me rrezikshmëri të mesme dhe të ulët.

Ndërkohë, ai bëri të ditur se 70 raste aktualisht janë nën monitorim elektronik, si pjesë e mekanizmave shtesë për mbrojtjen e personave që ndodhen në rrezik.

Megjithatë, Sveçla theksoi se pajisjet teknologjike dhe mekanizmat mbrojtës nuk mund ta zëvendësojnë përgjegjësinë njerëzore dhe profesionale të zyrtarëve që duhet të reagojnë në kohë dhe në përputhje me ligjin.

Përveç hetimit të plotë të rastit të Arlindës, shtoi ai, është e domosdoshme që gjetjet e raportit të shërbejnë edhe për identifikimin dhe adresimin e mangësive në procedurat institucionale për trajtimin e rasteve të dhunës në familje dhe mbrojtjen e viktimave.

“Përgjegjësia jonë është të sigurohemi që çdo veprim dhe mosveprim të hetohet deri në fund,” tha Sveçla duke shtuar se çdo qytetar dhe qytetare që kërkon mbrojtje nga institucionet e Republikës së Kosovës, duhet të ketë sigurinë se zëri i tyre do të dëgjohet, raportimi i tyre do të trajtohet me seriozitet dhe jeta e tyre do të mbrohet.

“Për t’u arritur kjo, duhet i gjithë zinxhiri i institucioneve përgjegjëse të funksionojë. Nuk guxojmë të lejojmë asnjë halkë të dështojë. Ky është detyrimi ynë institucional dhe standardi nga i cili nuk mund dhe nuk duhet të ketë shmangje,” tha Sveçla ndërsa i pyetur nga mediat për mundësinë e dorëheqjes shtoi:

“Ju e dini shumë mirë se para diku 10 vitesh, unë kam dhënë dorëheqje nga pozita e drejtorit të Inspektoratit në Komunën e Prishtinës, pa pasur kurrfarë përgjegjësie për rastin e atëhershëm, duke menduar se dorëheqja ime do të kontribonte në përmirësimin e praktikave në atë fushë.

Tash, unë nuk mendoj se dorëheqja jonë do të kontribonte në fuqizimin e gruas, në mbrojtjen e të drejtave të saj, meqë ne jemi të angazhuar 100% në përmbushjen e detyrave tona në këtë pike,” tha Ministri duke shtuar se i kupton pakënaqësitë dhe indinjatën e qytetarëve pas vrasjes së Arlindës, dhe vetë është në mbështetje të kërkesave të tyre, ndërsa përfundoi:

“T’ju thëm të drejtën, unë personalisht jam bashkë me protestuesit. Kuptoj edhe indinjatën e mllefin e protestuesve dhe po punojmë si institucione që të plotësojmë të gjitha ato kërkesa të cilat kërkohen sipas ligjit, në mënyrë që të parandalojmë përsëritjen e rasteve të këtilla, por në të njëjtën kohë edhe të hetojmë e të vlerësojmë rastet paraprake për lëshime potenciale.”

Ndërkohë, Kryeministri i Kosovës, Albin Kurti, liroi nga detyra Drejtorin e Përgjithshëm të Policisë së Kosovës, Gazmend Hoxha, pasi ka pranuar kërkesën e tij për dorëheqje, dhe sipas njoftimit të Qeverisë, me propozimin e ministrit të Punëve të Brendshme, Xhelal Sveçla, Kurti ka caktuar Fehmi Hotin si Ushtrues Detyre të Drejtorit të Përgjithshëm të Policisë së Kosovës.

Qeveria, thuhet në njofim, ka vlerësuar kontributin dhe angazhimin e Gazmend Hoxhës gjatë mandatit të tij.