Mesazhi, Berisha në SPAK: Dumani është mercenar i Padrinos së Shqipërisë, kjo seli është seksion i PS-së

“Altin Gjoka Hajri Troplini dhe pesë mbiemra të tjerë, armikut të egër të pluralizmit politik dhe votës së lirë të shqiptarëve, mercenarit të Padrinos së Shqipërisë, Edvin Kristaq Xhelati,” ishte mesazhi që la Kryetari i Partisë Demokratike, Sali Berisha, në SPAK ndërsa e bëri publike para kësaj prokurorie ose siç tha ai, oborri i selisë së Partisë Socaliste numër 2, i bindur se drejtësia vonon, por nuk harron.

Pasi zbatoi detyrimin ligjor “detyrim paraqitje” në Prokurorinë e Posaçme, Kryetari i Partisë Demokratike tha se SPAK ka amnistuar krimin monstruoz elektoral, ky është një institucion i narkoshtetit.

“Edhe njëherë dua të denoncoj krimin monstruoz të amnistisë nga ky institucion partiak të krimit elektoral.
Krimi elektoral në Shqipëri është sot i certifikuar me dokumentet më themelore të institucioneve ndërkombëtare që merren me zgjedhjet.

Krimi elektoral në Shqipëri ka arritur formën më të egër, më barbare, atë që quhet parti-shtet.
Institucionet më serioze ndërkombëtare, ODIHR, Asambleja Parlamentare e Këshillit të Evropës dhe Parlamentin Evropian kanë gjetur se zgjedhjet e 11 majit, partia dhe shteti, institucioni dhe strukturat partiake u shkrinë në një.
Por kjo për Altin Hajrin Gjokën Troplinin Farrukun, se zinxhirin e ka të pafundëm ky, pra për të, kjo nuk është krim.
Ky seksion i PS kryen krim të rëndë kushtetues kur nuk heton krimin elektoral dhe e amniston atë.
Shndërrohet në patericë kryesore të narkoshtetit dhe jo rastësisht mund t’u them se radhën tjetër do vij me maska antidrogë se aty qelbej drogë vendi.
Nuk e di se ç’kishte ndodhur sot, por u detyrova të përdor një shami xhepi si maskë për shkak të kundërmimit në të katër anë drogë të këtij institucioni.
Dhe krenarë se janë institucion i narkoshtetit.
Krenarë se mbrojnë narkoshtetin, i cili përbën pushtuesin më të egër të kombit shqiptar në të gjitha kohërat.
Përbën shkatërrimtarin më të madh të qenies sonë kombëtare, varfëruesin më të madh të shqiptarëve,” tha lideri i opozitës duke theksuar se këto ditë padroni i Edi Ramës u përmbys.

“Të dashur qytetarë dhe qytetare, keni dëgjuar këto ditë se padroni i Edi Ramës u përmbys.
Duhet t’u them këtu se ai ishte një Gjeorgjeviç në miniaturë.
Ai ishte një kriminel lufte, mbështetës i gjenocideve dhe krimeve kundër njerëzimit.
Por ai në Serbi, ndonëse kishte çdo mundësi, nuk ndërtoi narkoshtetin, siç ndërtoi argati i tij në Shqipëri.
Në krahasimin e 40 monedhave, se mediat ua fshehin ju këtë, ua fshehin rekordin më të zi botëror të Shqipërisë, leku, monedha më e fortë në botë në raport me euron dhe dollarin për shkak të tonelatave të narkoeurove që vijnë në Shqipëri dhe kthehen në lekë.
Leku ka zhvlerësuar në Shqipëri 33 përqind euron dhe 35 përqind dollarin.
Ka zhvlerësuar 33 përqind eksportet shqiptare.
Ka zhvlerësuar 33 përqind kursimet në euro të shqiptarëve.
Ka goditur në mënyrën më fatale turizmin.
Ka goditur prodhimin. Nga viti 2022 deri në vitin 2026, në qoftë se në Serbinë e Vuçiçit, eksportet u rritën nga 21 miliardë në 34 miliardë euro, në Shqipërinë e argatit të Vuçiçit, nga viti 2022 deri në vitin 2026, eksportet u vidhisën, ranë me 28 përqind të tyre.
Në qoftë se në Serbi prodhimi industrial u rrit me 3-4 përqind në vit, në Shqipëri ka rënien më të madhe pas Ukrainës në luftë, ka rënë me 15.3 për qind,” tha Kryetari i Partisë Demokratike ndërsa zbuloi skandalin, se në dosjen e Arubës është vetë Rama, e turisti i madh ka qenë vetë Padrinoja.

“Dhe aty fle dosja e Arubës, ku vetë Edi Rama, se tani më thonë që turisti i madh i Arubës ka qenë vetë Padrinoja.
Deri tani nuk e kisha këtë të dhënë. Tani del se në dosje është vetë Padrinoja. Aty flenë dosjet dhe ata mbrohen me ligj.
Se ata mbrojnë vjedhjen e votës.
Mbrojnë Taulant Ballën që bën marrëveshjen për të arrestuar banda rivale dhe për të marrë 200-300 mijë vota,” tha Kryetari i Partisë Demokratike, Sali Berisha, duke përfunduar:
“Të gjitha këto janë dhe do jenë dosje të drejtësisë së vërtetë. Ndaj dhe njëherë, drejtësia vonon por nuk harron.
Ata që shtypin pluralizmin duke përdorur ligjin, ata që bllokojnë rotacionin dhe mbështesin narkoshtetin, ata janë armiq të egër të Shqipërisë dhe shqiptarëve.”