Jep dorëheqjen Drejtori i Portit të Durrësit, Liburn Aliu

Liburn Aliu ka dhënë dorëheqjen nga detyra e Drejtorit të Autoriteti Portual Durrës. Në vend të tij, është emëruar Andrea Shllaku, i cili për disa vite ka punuar pranë APD-së në pozicionin e Drejtorit të Kabinetit, në kohën kur ky institucion drejtohej nga Pirro Vengu.

Mësohet se Liburn Aliu ka dhënë dorëheqje disa ditë më parë, pas kërkesës së Kryeministrit Edi Rama, për dorëheqjen e drejtorëve të institucioneve në varësi të ministrive, përfshirë nivelin qendror dhe rajonal.

Liburn Aliu e mbante këtë post që prej Tetorit të vitit 2025. Dy muaj para se të merrte këtë detyrë, ai ishte larguar nga qeveria e Albin Kurtit si ministër i Infrastrukturës.

Ndryshe, Andrea Shllaku ka mbajtur më herët edhe detyrën e Zv/Ministrit të Mbrojtjes për një periudhë prej vetëm katër muajsh, pasi në fillim të muajit prill u largua nga ky funksion me Vendim të Këshillit të Ministrave. Përpara këtij emërimi, ai kishte ushtruar funksionin e Këshilltarit të Jashtëm për Infrastrukturat Portuale pranë Ministrisë së Mbrojtjes.