Bllokimi i pagave të gjyqtarëve dhe prokurorëve, Gentian Keri në SPAK

Sekretari i Përgjithshëm i Ministrisë së Financave, Gentian Keri, sot është marrë në pyetje nga SPAK.

Mësohet se Gentian Keri është marrë në pyetje në kuadër të hetimeve për bllokimin e pagave të gjyqtarëve dhe prokurorëve.

Gjatë dëshmisë së tij, Sekretari i Përgjithshëm i Ministrisë së Financave ka deklaruar se ka vepruar në përputhje me ligjin. Ai është pyetur gjithashtu lidhur me pretendimet e një drejtoreshe të degës së Thesarit, e cila ka dëshmuar në SPAK se është kërcënuar prej tij. Gentian Keri ka sqaruar se nuk e kishte kërcënuar zyrtaren, por i kishte tërhequr vëmendjen për shkak se, sipas tij, ajo nuk kishte zbatuar ligjin.

Ndryshe, pasi 18 drejtues gjykatash dhe përfaqësues të shoqatave të gjyqtarëve dhe prokurorëve depozituan kallëzim penal në SPAK më 10 shtator, Gentian Keri është thirrur për të dhënë shpjegime lidhur me vendimmarrjen që çoi në moskalimin e pagave të magjistratëve.