Nesër Prokuroria Speciale sqaron çështjen e veteranëve të paligjshëm

Nesër në Prokurorinë Speciale të Kosovës do të mbahet një konferencë, ku do të sqarohen të gjitha dilemat që janë ngritur për aktakuzën e prokurorit të dorëhequr Elez Blakaj, për veteranët e luftës.

Kryeprokurori i Prokurorisë Speciale, Reshat Millaku e ka pranuar se njëra prej arsyeve pse s’ka shkuar aktakuza në Gjykatë është se nuk dihen kush janë përfituesit e paligjshëm.

“Njëra prej arsyeve pse aktakuza nuk ka shkuar në gjykatë është se nuk dihet kush janë përfituesit e paligjshëm. Ka vetëm shifra por jo emra konkretë”, ka thënë Millaku.

Në anën tjetër, organizatat që monitorojnë sistemin e drejtësisë presin që aktakuza e prokurorit Blakaj të dorëzohet në gjykatë dhe kjo të mbrohet nga një prokuror me integritet, i pavarur dhe i paanshëm.

Ndryshe, prokurori special Elez Blakaj ka ngritur aktakuzë ndaj 12 personave lidhur me listën e veteranëve të luftës.

Pas hetimit të tij, rezulton se 19 mijë persona janë futur në listë në mënyrë të paligjshme.