Kroaci, arrestohen dy shqiptarë për trafik droge

30 ditë burg është masa e arrestit për dy shqiptarët, njëri nga Shqipëria dhe tjetri nga Kosova, të cilët javën e kaluar u kapën në vendkalimin Bajakovë, në kufirin Kroaci-Serbi, duke trafikuar me makinë mbi 500 gramë heroinë dhe 5 kilogram marijuanë.

Sot Gjykata e Qarkut Osiek në vendimin e saj thekson se droga është zbuluar më 16 gusht nga shërbimi doganor kroat në Bajakovë, në një vend të fshehur në makinë. Gjithsejtë është gjetur 536 gram heroinë dhe  5.4 kilogram marijuanë

 Trafik i organizuar i drogës

Dy shqiptarët e dyshuar nga Shqipëria dhe Kosova, njëri rezident në Itali dhe tjetri në Zvicër, akuzohen për pjesëmarrje në trafikun e organizuar të sasive të mëdha të substancave narkotike në vendet e BE dhe Zvicrës.

Me propozimin e Zyrës kroate për luftën kundër krimit të organizuar dhe korrupsionit, USKOK, gjykatësi i Gjykatës që Qarkut Osiek përcaktoi masën e paraburgimit  prej 30 ditësh me dyshimin se kanë kryer vepra penale  të prodhimit dhe tregtimit të paligjshëm të lëndëve narkotike për llogari të një organizate kriminale.