Ndryshimet në Qeveri/ Dilema e madhe e Edi Ramës, Ministri i …

Pas takimit të ministrave me Edi Ramën në Vlorë nuk u tha asgjë rreth ndryshimeve që u paralajmëruan në qeveri, vetëm se u pranua nga mediat në shërbim të Ramës, se gjithçka ishte “blinduar” rreth asaj që u tha në këtë takim.

Por nga ana tjetër, asgjë nuk u “blindua” të akuzohet lideri i opozitës, Lulzim Basha, se është pasiv dhe kishte nga ato media që u investuan në përçarjen e rradhëve të Partisë Demokratike duke cenuar edhe foltoren e saj. U publikua edhe qeveria apo  emrat e ministrave, deputetë aktual që dalin në foltoren e partisë, duke ringjallur një garë dhe xhelozi në mes atyre që dalin për të denoncuar dhe lexuar deklaratat për shtyp ndërkohë qeveria e Edi Ramës vazhdon me abuzimet dhe dështimet si në kohën kur nuk ishte “e blinduar”

Dilema e Ramës   

Meqë pjesë e takimit të Vlorës ishin edhe ministra që regjistrojnë me celularë fjalët në takime nga më të çuditshmet, Pa Frikë mëson se ndër rradhët e Rilindjes ka plas sherri për disa poste ministrore, por Edi Rama po përballet me dilemën e madhe e cila i lindi së fundi, kush do të jetë Ministër i Brendshëm!

Ditmiri Bushatit i është ofruar posti i Ministrit të Drejtësisë dhe ai i Zv/kryeministrit ndonëse ishte krijuar ideja se Diplomacia është ministri e betonuar e tij për shkak të lidhjeve të ngushta që ai ka me Komisionerin Johannes Hahn dhe eurodeputeten që u shërbeu në kohërat opozitare, Tanja Fajon. Burime brenda partisë theksojnë se për shkak të së kaluarës familjare, Edi Rama disa herë është shprehur se Bushati do të ishte i mirë për Ministër të Brendshëm por që për momentin aktual atij i duhet në krye të Drejtësisë; Sa për BE-në dhe Brukselin, Edi Rama më nuk shqetësohet, dhe bashkëpunëtorët e tij theksojnë se ai shpesh e përmend lidhjet e ngushta që ka krijuar me kancelaren gjermane Angela Merkel dhe kjo i mjafton. Dhe në fund, verior për verior, heq dy – Bushatin dhe Mesin, dhe i zëvendëson me një të vetëm, Ditmir Bushatin.

Mëkëmbsja e Skënderbeut, Elisa Spiropali ka plotësuar të gjitha kushtet që ti besohet ministria që Edi Rama e ka shumë për zemër ta luftoj: Ministria e Mbrojtjes. Nuk është se Olta Xhaçka nuk e luftoi Aleancën Veriatlantike por Spiropali si anarakiste e kuqe do ta bëjë këtë punë pa shqetësime për kryeministrin. Duke pasur parasysh konfliktin që lindi në mes të Rexhep Taip Erdoganit dhe Presidentit Trump, dhe problemit që lindi në Samitin e fundit të NATO për buxhetin e Aleancës, kryeministri kishte shfaqur shqetësimin për përballjen me tekat e presidentit amerikan. Angazhimi i fundit mediatik i Spiropalit ka zhdukur nga faqja e dheut ccdo dilemë të kryeministrit.

Ministrja e Shteti për Mbrojtjen e Sipërmarrjes, Sonila Qato nuk është se është lakuar si emër nëse punon ose jo, por ka ardhë momenti i dekorimit të angazhimit të Artan Lames, emër ky që ishte zhdukur nga lista në ditën e fundit të shpalljes së qeverisë Rama 2.

Siç duket Blendi Klosi o ta ketë fundin si Ministër Turizmit dhe Mjedisit, në Asamblenë e PS. Shpesh është folur si për një ministër të lodhur, ky informacion kishte shkuar në rrugë informale edhe në kabinetin e tij, por aksionet e gjatëverës nuk ndihmuan në krijimin e një imazhi të ri tek kryeministri. Dhe, kur Edi Rama pranoi charterin e Iglit, të gjithë ata që e njohin Auronin u shprehën se ai u bë Ministër i Turizmit, e për ata që nuk e njohin Auron Taren, e kanë të qartë se fotoja me Ronaldon kushton!

Ministrja e Kulturës nuk do të jetë më temë e zakonshme në mes të kryeministrit dhe kryetarit të bashkisë së Tiranës. Siç thonë burime brenda partisë, shumë emra nga MJAFT-i i janë ofruar Edi Ramës, por meqë i ka konsumuar që të gjithë, në listën e kryeministrit janë dy regjisorë, Kumbaro dhe Londo, persona që mendohet se do të shuajnë edhe konfliktin për Teatrin Kombëtar, për zbatimin e të cilit projekt, Erion Veliaj vazhdon të jetë i sigurtë se do ta fitoj betejën.

Përfoljes së emrit të Damian Gjiknurit, si Ministër i Infrastrukturës dhe Energjisë, ose ministrisë më të fuqishme në këtë kabinet qeveritar po i vjen fundi. Niko Peleshi siç duket edhe  në këtë rast do ta shpëtoj Edi Ramën, ndonëse Nikoja e ka kundërshtuar këtë post. “Merre ose leje” është oferta ndërsa Gjiknuri në ministrinë e cila parashikohet të financohet me fonde të mëdha evropiane, është mjeshtëri më i madh i kësaj pune.

Dhe në fund, vjen dilema e madhe e Edi Ramës, ajo që gjatë këtyre ditëve e ka shqetësuar kryeministrin dhe nuk u ndihmua as me qetësinë të cilën i ofroi vila qevertare në Vlorë. Që Fatmir Xhafaj nuk është më ministër, këtë e ka të qartë jo vetëm Saimir Tahiri por edhe Agroni me Geronin. Burime brenda partisë theksojnë se Taulant Balla ishte çështje e kryer si pasardhës i Xhafajt, por CV-ja që Taulanti prezantoi për Edmond Begon dhe mbështetja publike që ky i fundit mori nga Komuniteti Mysliman Shqiptar, e kanë thelluar në mendime Edi Ramën.

Pra, këto janë ndryshimet qeveritare që priten të bëhen në Asamblenë e PS, kur do të shuhet edhe dilema e madhe për Ministrin e Brendshëm: Taulant Balla apo Edmond Bego…