Organizimi i ri territorial, prej sot Tuzi komunë e pavarur

Prej sot, me hyrjen në fuqi të Ligjit të ri për organizimin territorial, Tuzi fiton statusin e Komunës se pavarur, që ishte edhe pikësynim i pothuajse të gjitha partive shqiptare që prej futjes së sistemit shumë partiak në Mal të Zi.

Nënkryetari i Forcës se re demokratike dhe nënkryetari i Parlamentit të Malit te Zi, Genc Nimanbegu tha në Kuvendin e Komunës së Tuzit se është i kënaqur që ishte pjesë e ekipit i cili e realizoi këtë pikësynim të kamotshëm të gjithë shqiptarëve dhe fillimit të shumpartizmit në Mal të Zi.

Ministri në Qeverinë e Malit te Zi, Meto Zenka, e njëkohësisht edhe kryetar i UDSH, rikujtoi se ky qëllim ka qenë, pothuaj se i të gjitha subjekteve shqiptare që nga futja e parlamentarizmit në Mal të Zi dhe se është meritë e të gjithëve që ndihmuan në jetësimin e këtij qëllimi të përbashkët,që tregon qartë se kur punohet nga të gjithë për një qellim, ai edhe do të realizohet.

Të pranishëm ishin edhe kryetari i Forcës, Nazif Cungu dhe kryetari i Alternatives Shqiptare, Gjergj Camaj të cilët theksuan se statusi i Komunës së pavarur do të kontribuoj në funksionimin më të mirë të shërbimit për qytetarët dhe realizimin e të drejtave të rregulluara me Ligjin për qeverisje lokale, ndërsa obligimet e Komunës ndaj qytetareve do të jenë edhe më efikase. Sipas tyre, do te përmirësohen shërbimet ndaj qytetarëve dhe të gjitha të drejtat nga qeverisja lokale do të mund ti realizojnë në gjuhën amtare.

Ndërsa zyrtari i ASH Nikë Gjeloshaj pohoi se komuna do të këtë buxhetin e vet i cili do të përdoret për nevojat e qytetareve dhe zhvillimin e infrastrukturës për lagjet e banuara si dhe për zhvillimin e biznesit dhe investimet në bujqësi, turizëm etj.