Thaçi i gatshëm pë takim me Vuçiçin. Presidenti i Serbisë shkoi në Bruksel por ende nuk ka vendosur…

Dialogu ka kuptim vetëm kur ka njohje reciproke ndërmjet Kosovës dhe Serbisë. Kështu deklaroi presidenti i Kosovës, Hashim Thaçi vetëm pak minuta para se të nis takimi i tij me homologun serb, Aleksander Vuçiç që pritet të mbahet në  Bruksel nën ndërmjetësimin e  Përfaqësueses së Lartë për Politikë të Jashtme dhe Siguri pranë Bashkimit Evropian, Federica Mogherini, për të diskutuar rrugët për një marrëveshje normalizimi ndërmjet të dyja vendeve.

Thaçi tha se po hymë në procesin përfundimtar të dialogut në mes Kosovës dhe Serbisë me besimin që do të shënohet një progres për të dy popujt dhe për paqen në rajon.

Sipas tij, dialogun në mes Kosovës dhe Serbisë, askush nuk mund ta ndërlidhë me ndonjë rast tjetër nëpër botë dhe të gjitha tonet për luftë apo refugjat janë çështje apsurde.

“Marrëveshja përfundimtare ka kuptim vetëm atëherë kur do të ndodhë njohja reciproke në mes Kosovës dhe Serbisë,” tha ai.

Ndërkohë mediat serbe bëjnë me dije se Presidenti Vuçiç do të takohet me shefen e diplomacisë evropiane, Mogherini në orën 10::00 por nuk dihet nëse do të takohet me presidentin e Kosovës. Vendimi sipas mediave serbe, do të merret në takimi Vuçiç-Mogherini.