Serbi, sulmohet një autobus nga Kosova

Një autobus i kompanisë Barileva, i linjës Këln-Prishtinë, është sulmuar sot në Serbi, por fatmirësisht nuk ka persona të lënduar.

Incidenti është dënuar nga zëvendëskryeministri i parë i Kosovës, Behgjet Pacolli, i cili ka thënë se një sulm i tillë është i papranueshëm dhe duhet të dënohet urgjentisht nga BE-ja, komuniteti ndërkombëtar dhe institucionet e rendit dhe ligjit në Serbi.

“Sulmi, me mjete të forta, por fatmirësisht pa lëndime në njerëz, që sot ka ndodhur ndaj një autobusi të një kompanie kosovare, përderisa po kalonte tranzit nëpër territorin e shtetit fqinj -Serbisë është i papranueshëm. Institucionet sigurisë të Serbisë duhet të marrin mësim nga profesionalizmi, përkushtimi dhe përgjegjësia e Policisë së Republikës së Kosovës ndaj të gjithë shtetasve dhe qytetarëve, që jetojnë në Republikën e Kosovës”, shkruan Pacolli në Facebook.

Ndryshe, sulmi ndaj autobusit ndodhi në ditën kur në Kosovë përfundoi vizitën e tij dyditore presidenti serb Aleksandar Vuçiç.