Kukan: Nëse ka zgjedhje të parakohshme, do të ketë kaos në Maqedoni

Një ditë para votimit për raportin e Maqedonisë në Komisionin për punë të jashtme të Parlamentit Evropian, eurodeputetët këmbyen mendime për gjendjen në vend pas referendumit për Marrëveshjen për emrin. Disa tensione u paraqitën edhe me eurodeputeten greke nga SYRIZA.
Eurodeputetët nesër do të votojnë edhe për një amendament me gojë i dhënë nga ana e raportuesit Ivo Vajgëll pas 30 shtatorit i cili thotë se notohet rezultati nga referendumi dhe thekson se nevojitet mbështetje plotësuese për ardhmërinë euroatlantike të vendit dhe ratifikimi i Marrëveshjes së Prespës. Deputetët do ta inkurajojnë Qeverinë që t’i ndërmerr të gjithë hapat e nevojshëm për respektimin e dispozitave nga marrëveshja, raporton Agjencia maqedone e lajmeve MIA.
Në këtë kontekst, eurodeputetët potencuan se në këtë moment nuk dihet se nëse në Maqedoni do të ketë sukses të gjendet shumicë prej dy të tretave për miratimin e Marrëveshjes ose do të shkohet në zgjedhje të parakohshme. Eduard Kukan, nga Partia Popullore Evropiane, porositi se në qoftë se ka ndryshime në gjendjet në Maqedoni, përmbajtja do të mund të adaptohet kur raporti për Maqedoninë do të miratohet në seancë plenare të PE-së në nëntor.
“Vërejtja ime e vetme është se nëse nevojitet të mbahen zgjedhje të parakohshme do të ketë kaos në vend një kohë të gjatë”, tha Kukan në debatin për Maqedoninë, duke shtuar se ekziston shqetësim serioz për vendin.
Ai e përshëndeti punën e Ivo Vajgëll dhe tha se do ta mbështesë raportin.
Raportuesi Vajgëll theksoi se në Maqedoni situata është më e mirë në krahasim me vitet e mëparshme dhe se Marrëveshja e Prespës e ka kthyer optimizmin lidhur me vendin në BE.
Tani, tha ai, “e kërkoj mbështetjen tuaj për amendamentin me gojë të cilin e dorëzova derisa presim që hapat e ardhshëm t’i paralajmërojë Qeveria e Maqedonisë”.
“Qëllimi është që të vazhdohet të mbështetet afrimi i vendit drejt BE-së dhe NATO-s në qoftë se kjo dëshirë shfaqet nga ana e vetë shtetit”, tha raportuesi.
Eurodeputeti Knut Flekenshtajn nga socialdemokratët shfaqi shpresë se Marrëveshja e Prespës nuk do të bëhet dëm kolateral i një krize të mundshme politike në vend.
Konservatori Çarls Tanos, nga ana e tij, porositi se pa marrëveshje me Greqinë për kontestin procesi i inkuadrimit të Maqedonisë në BE do të bëhet “stërvitje akademike”.
“Po dëgjojmë zëra të ndryshëm nga vendi, të cilët vështirë lexohen, megjithatë zhvillimi nga uikendi i kaluar tregon se marrëveshja ndoshta nuk do të materializohet, flitet për zgjedhje të parakohshme, dhe, siç tha i dërguari special i KB-së, Methju Nimic, ndoshta do të nevojiten edhe 25 vite për marrëveshje të re nëse kjo mundësi historike kalon”, tha Tanok.
Tension u paraqit midis eurodeputetes greke, Sofia Sakorafa nga SYRIZA dhe Knut Flekenshtajn, pasi ajo porositi se nuk e mbështet Marrëveshjen e  Prespës dhe e quajti “artificialisht të imponuar”, për çka Flekenshtajn iu përgjigj duke kërkuar përgjigje se nëse ky është qëndrimi i partisë së saj, Sakorafa refuzoi t’i përgjigjet dhe e akuzoi Flekenshtajnin se është “kundër Greqisë”.
Për fjalë u paraqit edhe deputeti Stelio Kullugllu nga SYRIZA i cili, për dallim nga Sakorafa, e përshëndeti Marrëveshjen e Prespës dhe guximin e dy kryeministrave.
Votimi në Komisionin për punë të jashtme do të mbahet nesër në mesditë në Bruksel.