Këshilli i Legjislacionit/ Vettingu në Politikë, Salianji: Procesi të mos shtyhet në pafundësi, situata është dramatike!

Ne kërkojmë që të bëhet kontrolli i pasurisë së politikanëve. Nuk ka më pse politikanët të jenë të privilegjuar në shoqëri. Kështu u shpreh deputeti i PD, Ervin Salianji, në Këshillin e Legjislacionit ku po përfaqësonte Partinë Demokratike në dëgjesën që po zhvillohet për nismën e opozitës për Vettingun në Politikë ndërsa kërkojë që ky proces të mos shtyhet në pafundësi sepse situata është dramatike, sot kur politikanët janë të lidhur me krimin.

“Nuk besoj se në 5 vite ato që kemi thënë ne, po dalin qartazi persona të lidhur me krimin. Ne kërkojmë që të bëhet kontrolli i pasurisë së politikanëve. Nuk ka më pse politikanët të jenë të privilegjuar në
shoqëri. Nuk mund ta shtyjmë në pafundësi një proces të tillë. Situata është dramatike sot kur politikanët janë të lidhur me krimin. Tenderat, koncesionet, PPP, i jepen vetëm një pjese. Vullneti i PD është vullneti i
çdo qytetari. Duam paketën antimafia, duam dekriminalizimin e zgjedhjeve. S’duam më teatër për qytetarët, për ta zgjatur sa më shumë miratimin e vetingut të politikanëve.,” tha deputeti i PD duke shtuar se çdo qytetar po e sheh me zë e figurë se si po faktohen akuzat tona:

“Nuk besoj se ka qytetar që nuk e do këtë, që nuk traumatizohet nga një kryebashkiak që thotë se unë e njoh “Niçen”, unë e njoh atë…dhe e quan normale komunikimin me ta.

Nuk ka qytetar që nuk tronditet kur dëgjon kreun e Grupit të PS, Tauland Ballën, që pohon “po, unë e kam mik atë trafikant droge të dënuar,” tha deputeti i Partisë Demokratike duke sqaruar kërkesën e thjeshtë dhe normale për një klime politike kaq kriminale, si dhe duke kërkuar që sot të bëhet kontrolli i integritetit dhe pasurisë të politikanëve, njësoj si për gjyqtarët dhe prokurorët.