Ministër i Brendshëm/ Betohet Sandër Lleshaj! Për çfarë, mbetet për tu parë…

Në prani të Zv/kryeministres Senida Mesi, kreut të grupit parlamentar të Partisë Socialiste, Taulant Balla dhe anëtarëve të Kabinetit të Presidentit, u zhvillua sonte ceremonia e betimit të anëtarit më të ri të kabinetit qeveritar, Ministrit të Brendshëm Sandër Lleshaj.

Pas ekzekutimit të himnit kombëtar, leximit të dekretit të emërimit dhe formulës së betimit, ministri Lleshaj u betua para Presidentit të Republikës, Ilir Meta, mbi Kushtetutën të cilën para dy javësh e shkelin si Lleshaj ashtu edhe Meta.

Sidoqoftë, Presidenti Meta i dorëzoi dekretin e emërimit Ministrit të Brendshëm, duke i uruar suksese në detyrën e re dhe  shumë të rëndësishme.

Ndryshe, pas dy javë përplasjesh mes institucionit të Presidencës dhe Kryeministrisë, një javë më parë, Presidenti Meta dekretoi Sandër Lleshajn si ministër.

Kërkesën e parë të Kryeministri Rama për Sandër Lleshin si ministër, Meta nuk e dekretoi, duke u shprehur se nuk kishte krijuar bindjen e plotë për këtë kandidaturë. Madje u shprehë i gatshëm që me dyer të mbyllura do të jepte edhe sqarime në Kuvend.

Por Kryeministri Rama e ridërgoi kërkesën për dekretim në Presidencë, pasi e emëroi Sandër Lleshajn zv.ministër të Brendshëm, dhe me dyertë e hapura, Presidenti tha se kishte  marrë informacionet e duhura nga ministria e Mbrojtjes për gjeneral Lleshajn, e çdekretoi si ushtarak aktiv, dhe në fund tha me demek se ky ishte sebepi që e kishte detyruar të mos e dekretonte si ministër.