Vendimi/ KPK shkarkon gjyqtarin e Apelit të Shkodrës, Luan Dervishi

Komisioni i Pavarur i Kualifikimit, KPK, ka shkarkuar sot gjyqtarin e Apelit të Shkodrës, Luan Dervishi.

KPK, duke iu referuar të dhënave të deklaruar nga vetë gjyqtari në ILDKPI, thekson se gjyqtari i Gjykatës së Apelit në Shkodër ka bërë deklarim të pasaktë të pasurisë, ndërsa nga të dhënat e tjera të siguruara nga DSIK-ja theksohet se ai rezulton të jetë i përfshirë në afera korruptive.

Seanca dëgjimore me Luan Dervishin u zhvillua mesditën e së premtes, ndërkohë që trupi gjykues përfaqësohet nga Etleda Çiftja, Firdes Shuli dhe Pamela Qirko.

Gjyqtari Dervishi u bë pjesë e listës së dytë të kandidatëve për Këshillin e Lartë Gjyqësor, pas vakancës së shpallur për një pozicion nga Gjykatat e Apelit jashtë Tiranës.

Ndryshe, Luan Dervishi  ka mbaruar fakultetin e Drejtësisë në vitin 1985 dhe para se të emërohej gjyqtar në Gjykatën e Apelit të Shkodrës ka punuar si inspektor pranë Këshillit të Lartë të Drejtësisë.