Parashikimet e sakta, Kurti: Ata që ikin nga Vetëvendosje përfundojnë në prehërin e PDK-së

Këshilli i Përgjithshëm i Lëvizjes Vetëvendosje sot ka mbajtur mbledhjen e 35-të. Kryetari Albin Kurti përveç diskutimit mbi situatën politike ka folur edhe për punën e partisë gjatë këtij viti ndërsa Sekretarja Organizative, Vlora Haxhimehmedi, ka prezantuar raportin e punës së qendrave por edhe të Sekretariatit të Përgjjthshëm.

“Gjatë vitit 2018, deri më sot, ne i kemi patur 5.120 anëtarësime të reja. Nuk ka asnjë vit prej se jemi themeluar me kaq shumë anëtarësime brenda vitit. Dhe, pasi i kemi përditësuar e pastruar listat, sot ne i kemi mbi 36.500 anëtarë gjithsej, duke qenë një prej organizatave politike më të fuqishme jo vetëm në Kosovë, por edhe më gjerë. Sigurisht, suksesi nuk ka qenë vetëm tek anëtarësimet, por edhe te strukturimi i brendshëm. Gjatë këtij viti ne i kemi bërë edhe 146 pika të reja, pra jemi shtrirë edhe në 146 lagje qytetesh apo fshatra anembanë komunave të Kosovës ku më përpara nuk kemi patur strukturë,” tha Albin Kurti ndërsa foli edhe për këtë vit të pazakontë me daljen e disa anëtarëve të saj, që sipas tij, nuk ia dolën ta dëmtojnë Vetëvendosjen.

“Nuk e dinim pse ndodhi kjo, cilat ishin arsyet dhe shkaqet e qëndrimit armiqësor ndaj lëvizjes dhe ndaj meje. Arsyen e kësaj tentative hileqare e kuptuam vetëm dje kur i pamë në media mesazhet e publikuara”, tha Kurti duke shtuar:

“Trishtohemi që parashikimet tona po dalin të sakta. Kushdo që po del prej Vetëvendosjes po përfundon në prehër të PDK-së”.

E veçanta e këtij Këshilli të Përgjithshëm të Vetëvendosjes ishte se brenda objektit ku mbahej mbledhja kishte edhe çerdhe për fëmijët e vegjël të delegateve e delegatëve. Kjo është organizuar nga Sekretariati i Përgjithshëm me qëllim të  lehtësimit të pjesëmarrjes, në veçanti grave delegate. Gjatë mbledhjes janë miratuar edhe tri rezoluta të cilat do të publikohen në tri ditët e ardhshme.