Në prehërin e PDK/ Reagimi, Molliqaj: Grupi i falltorëve të dobët…

Pas deklaratës së kryetarit të Lëvizjes Vetëvendosje se ndjehen të trishtuar që parashikimet e tyre po dalin të sakta, se “kushdo që po del prej Vetëvendosjes po përfundon në prehër të PDK-së” ka reguar deputeti i PSD, Dardan Molliqaj, i cili edhe pse është njëri ndër themeluesit e saj, këtë parti e quan grup i falltorëve të dobët.

Duke folur për komentet se PSD do të hyjë në qeveri, Molliqaj përmes rrjetit social Facebok tha se i vjen keq që do t’i zhgënjejnë pasi që jo vetëm që nuk do të futen por do të angazhohen vazhdimisht ta largojnë nga pushteti PDK-në.

Ndryshe, ndonëse parashikimi i Lëvizjes Vetëvendosje nuk fliste për këtë fenomen të politikës kosovare, të gjithë ata që kanë ikur nga partitë e tyre mëmë dhe kanë përfunduar në shërbim të PDK-së, që të gjithë pa përjashtim nuk kanë pushuar së shari partinë të cilën e kanë braktisur, dhe përgjithësisht ishin ndër themeluesit kryesor.

Ja postimi i plotë:

Fillimisht, rupi i falltorëve të dobët thanë se ne u larguam sepse ishim spiun të Stanishiqit.

Pastaj thanë se ne u larguam sepse na kishin blerë Devollët.

Më vonë thanë se arsyeja e largimit tonë ishte ndikimi i ambasadeve ndërkombëtare.

Dikur thanë se ne u larguam për ta votuar demarkacionin me Malin e Zi.

Pastaj “zbuluan” se ne u larguam për shkak se ishim të interesuar për tu futur në Qeveri.

Pak më vonë thanë se në fakt arsyeja e largimit tonë qenka falja e tokave Serbisë.

E sot e paskan “zbuluar” se kemi dalur për të përfunduar në prehër të PDK-së.

Kushedi se cfarë zbulime e parashikime do të dalin tash e tutje nga grupi i falltorëve të dobët. Por, ajo që dihet është që kësaj partie iu ka ndalur ora qysh kur ne jemi larguar nga aty. Vazhdimisht thonë se jemi pak aktivistë, të vegjël e të parëndësishëm, por vihen shumë në siklet nëse kalon vetëm një ditë pa shpifur për neve. E ne fatkeqësisht do t’i zhgënjejmë. Përveq se nuk do të futemi në këtë Qeveri, do të angazhohemi vazhdimisht që PDK-në ta largojmë nga pushteti pas kaq shumë vitesh keqqeverisje. Ju vazhdoni të qitni fall, se pavarësisht që parashikimet i keni të dobëta, ndoshta me kalimin e kohës përmirësoheni në këtë fushë.