Reshje bore/ Mbyllen shumë shkolla, ARRSH: Ja ku kalohet vetëm me zinxhir…

Reshjet e borës dhe temperaturat e ulëta gjatë këtyre ditëve kanë bllokuar mjaft rrugë në Shqipëri, veçanërisht në zonat rurale.

Një prej qarqeve më problematike vazhdon të mbetet Elbasanit ku mësimi nuk zhvillohet në disa shkolla të Bashkisë Elbasan, Labinot Mal, në Qaf Shmil, Lukaxhi. Në Librazhd e Përrenjas, mësimi nuk zhvillohet në 8 shkolla. Ndërkohë Autoriteti Rrugor Shqiptar raporton për gjendjen e rrugëve në akset kryesore, dhe për shkak të temperaturave të ulëta, rekomandon përdoruesit e rrugës të bëjnë kujdes, të lëvizin me shpejtësi të reduktuar dhe të përdorin gomat e dimrit. 
Gjithashtu gjatë lëvizjes duhet të respektojnë sinjalistikën rrugore.

Rajoni Verior: Gjatë natës ka pasur temperatura të ulëta. Në të gjitha akset ku ka prezencë ngricash, është bërë shpërndarja e kripës nga ana e kontraktorëve.

Segmentet që janë të kalueshme me zinxhir ose pjesërisht me zinxhir janë:

Domaj- Drajë Rec
Qafë Mali- Fierzë
Ura e Cerenecit-Steblevë
Kuben-Vasije
Peshkopi-Qafë Drajë
Peshkopi-UShtelencë
Qafë Bualli-Krastë
Trebisht-Doganë

Në akset e tjera qarkullimi është normal.

Rajoni Qendror: Gjatë natës ka pasur temperatura të ulëta dhe tani kanë filluar reshje të dobëta. Është punuar nga kontraktorët që në orët e para të mëngjesit për shpërndarjen e kripës në segmentet ku ka prezencë ngricash.

Qarkullimi në akset e këtij Rajoni është si më poshtë:

Aksin nga Trau i Dajtit-Teleferik -Vilat Qeveritare, rekomandohet përdorimi i zinxhirëve , për shkak të prezencës së ngricave. 
Qafë Priskë-Shëngjergj rekomandohet përdorimi i zinxhirëve për shkak të prezencës së ngricave.
Qafë Priskë-Qafë Mollë rekomandohet përdorimi i zinxhirëve.
Aksi Krujë Sarisalltik rekomandohet pjesërisht me zinxhir.
Lunik-Steblevë rekomandohet me zinxhir në pjesën fundore të tij.

Në akset e tjera qarkullimi është normal.

Rajoni Jugor: Gjatë natës ka pasur temperatura të ulëta, sidomos në Qarkun e Korçës. Që në orët e para të mëngjesit është bërë shpërndarja e kripës nga ana e kontraktorit për shkak të temperaturave dhe prezencës së ngricave në rrugë.

Qarkullimi në akset e këtij Rajoni paraqitet si më poshtë:

Në Qarkun Korçë qarkullimi është normal pa zinxhir.
Në Qarkun Gjirokastër qarkullimi normal pa probleme.
Në Qarkun Vlorë qarkullimi i mjeteve bëhet normalisht pa zinxhir.

Të gjithë kontraktoret, thekson ARRSH, janë në gatishmëri, pasi pritet që pasdite të ketë reshje bore.