Qeveria ka rënë, Basha: Goditjen përfundimtare, Edi Rama do ta marrë nga…

Qeveria ka marrë goditjen nga protesta e studentëve, tani duhet të marrë goditje përfundimtare nga qytetarët e bashkuar. Kështu u shpreh kryetari I Partisë Demokratike, Lulzim Basha pas takimit me ministrin e jashtëm të Holandës, Stef  Blok, duke shtuar se rruga e vetme është ajo e bashkimit të qytetarëve për t’i dhënë fund kësaj fasade ku një grusht politikanësh me në krye Edi Ramën, një grusht oligarkësh dhe një grusht kriminelësh kontrollojnë fondet e buxhetit.

“Ne kemi vendosur të udhëheqim protestat, dhe do të bëhemi gati të parashtrojmë zgjidhje politike për të cilën do të kemi vendimmarrje në Këshill ditën e shtunë dhe mobilizim të opozitës së bashkuar me qytetarët. Kjo qeveri ka rënë, para syve të qytetarëve, botës, Evropës, ajo përfaqëson interes privat të Ramës në funksion të sundimit për interesa personale.”

Dhe jo vetëm kaq! Kryetari i Partisë Demokratike sqaroi se qëllimi kryesor nuk është largimi dhe zëvendësimi thjesht i një njeriu, por i sistemit të tërë:

“Ne synojme, jo largimin dhe zëvendësimin thjesht të një njeriu, por të një sistemi që të punojë për vendin dhe qytetarët. Sezoni i protestave që do të nisë do të jetë mundësi për të folur hapur me njerëzit, ndarjen e politikës nga krimi, për ti kthyer vendin qytetarëve, dekriminalizimin e zgjedhjeve”.