Arrestimi i deputetëve/ Edi Rama rikthen imunitetin, Alibeaj: Pse, kush e ka radhën?!

Edi Rama ka vendosur të ndryshojë rregulloren e Parlamentit për rastet kur Prokuroria do të kërkojë arrestimin e deputetëve apo ministrave të qeverisë.

Sot, Projektligji i sjellur nga mazhoranca në Komisionin e Ligjeve ka shkaktuar debate midis deputetëve të opozitës dhe atyre të Rilindjes.

Deputeti i PD, Enkelejd Alibeaj tha në Komisionin e Ligjeve se mazhoranca është frikësuar nga arrestimet, ndaj po i paraprin situatës duke ndryshuar Rregulloren e Parlamentit.

“Ndryshimet e Rregullores duhet t’i shqyrtojë Këshilli i Mandateve dhe Rregullores, jo komisioni i Ligjeve. Në rastin më të mirë është një lapsus,” tha Alibeaj duke shtuar:

“Doni ta miratoni vetë duke shkelur traditën 30-vjeçare të parlamentit. Tani u binda që nuk është lapsus dhe dua të di arsyen pse u shty, që të miratohej në shkelje me rregullore.”

Ish-Ministri i Drejtësisë dhe deputeti aktual i Partisë Demokratike, Enkelejd Alibeaj ndërsa konstatoj qëllimin e mazhorancës për ta rikthyer imunitetin pyet se kush e ka radhën:

“Ditën e parë që vijmë në komision e prisni opozitën me këmbët e para. Doni të riktheni edhe një herë imunitetin e deputetëve. Meqë ra fjala, kush e ka radhën?! Frikën kush e ka? Po fusni edhe një herë koracën imunitare për të mbrojtur deputetët nga ndjekja penale.”