“Komisioni Tahiri”/ Paloka: Rrëzuan kërkesën për shtyrje. Balla: I ka mbarua mandati…

Mazhoranca ka hedhur poshtë kërkesën e opozitës në Konferencën e Kryetarëve në Kuvend për shtyrjen e mandatit të Komisionit “Tahiri”. Këtë e ka bërë të ditur pas Konferencës, Nënkryetari i Partisë Demokratike dhe kryetari i Komisionit Hetimor për Implikimin e Strukturave Policore në Trafikun e Drogës, Edi Paloka, duke treguar dhe arsyen pse është kërkuar kjo shtyrje ndërkohë kreu i Grupit Parlamentar, Taulant Balla nxitoi të sqaroi në media pse mazhoranca e Edi Ramës po minon jetën parlamentare:

“Nuk kemi mund të hedhim asnjë hap me tej, pasi institucionet nuk kanë kthyer asnjë përgjigje. Janë vetëm kërkesat e para që duan të shtyjnë afatin për kthimin e përgjigjeve. Policia tha në atë kohë se kishte Vettingun dhe nuk kishte kohë të merrej me gjera të tjera. Nuk ka asnjë përgjigje për të ardhur sot, unë kërkova shtyrjen e afatit, por u hodh po ashtu me pretendimin se ka kaluar afati për kërkesë për shtyrjen e tij,” tha Edi Paloka duke e bërë të qartë se këtij hetimi do ti shkojnë deri në fund:

“Ne jemi të vendosur do ta ri bëjmë kërkesën dhe komisioni do të shkoj deri në fund. Ruçi u tërhoqi formalisht vërejtje të gjithë institucioneve që të kthejnë përgjigje. Nuk mundet as Rama dhe as kush tjetër, që të demaskojë lidhjet që kjo qeveri ka drejt përdertë me krimin. Ky komision ka marrë emrin e Tahirit, por do të hetojë të gjitha lidhjet e qeverisë më drogën nga Rama tek Taulant Balla. Tahiri është në qendër të vëmendjes, por lidhjet janë më të shumta,” tha kryetari i “Komisionit Tahiri” , Edi Paloka.

Me daljen e kryetarit të Grupit Parlamentar të Rilindjes, Taulant Balla, u krijua ideja se ai doli të sqarohej pas deklaratave të Palokës, por Balla nuk doli dot nga vetja, si zakonisht tregoi zellin për kundërshtimin e jetës parlamentare dhe akuzoi Partinë Demokratike, ku nuk mungoi as sot, fyerja në ligjërimin e tij:  

“Partia Demokratike kishte harruar që kishte kërkuar ngritjen e një Komisioni Hetimor. Dihet qëndrimi ynë i qartë dhe sa herë të ketë kërkesë ne do ta ngremë komisionin,” tha Taulant Balla duke zbrazur edhe karikatorin e Edi Ramës: “Në kushtet që ka dy muaj që komisionit i ka mbaruar mandati dhe opozita ka fjetur gjumë, opozita duhet të sjellë kërkesën përsëri që të vijojë procesi hetimor siç e duan ata. Në asnjë rast nuk do të shkelet nga ana jonë as ligji e as Kushtetuta nuk do ta lejojmë këtë gjë se opozita ka qenë në gjumë!”