Historike/ Parlamenti i Maqedonisë, Xhaferi e udhëheq seancën në gjuhën shqipe

Kryetari i Parlamentit të Maqedonisë, Talat Xhaferi sot për herë të parë në historinë e punës të këtij parlamenti e filloi seancën në gjuhën shqipe. Menjëherë reagoi kryetari i Grupit Parlamentar të VMRO-DPMNE, Nikolla Micevski, duke shtuar se kryeparlamentari po shkel Rregulloren.
“Ju vazhdimisht e shkelni Kushtetutën, ligjet, Rregulloren. Në Rregullore, Neni 3.  thotë se në punën e Parlamentit, gjuhë zyrtare është gjuha maqedonase dhe shkrimi i saj,” tha ai dhe shtoi se fillimisht duhet të ndryshohet Rregullorja, në mënyrë që Parlamenti të punojë pa pengesë dhe të mos e shkelë Rregulloren.

Xhaferi i bëri të qartë Micevskit se Ligji për përdorimin e gjuhëve është miratuar, ai është në fuqi dhe shtoi se ai ka pasur durim një vit që nga janari i vitit 2018 e deri në janar të këtij viti, dhe ka pritur që Presidenti ta nënshkruajë Ligjin dhe të kuptojë se nuk mund të pengohet Parlamenti dhe vullneti i shumicës.

“Secila punë ka fillimin e saj dhe rrjedhën e saj, dhe ne si institucion kemi për obligim t’i bëjmë të gjitha përgatitjet, vërejtjet tuaja nuk janë të bazuara.”

Ndërsa kryetari i Grupit Parlamentar të LSDM-së, Jovan Mitrevski, tha se koncepti i kësaj Qeverie, i kësaj shumice parlamentare, është ndërtimi i një shoqërie për të gjithë, ndërsa gjuha, si një ndër shtyllat e kësaj shoqërie, është që të kuptohemi.

“Për ne si deputetë të shumicës parlamentare më shumë ka rëndësi që do të flasim, të miratojmë ligje në interes të qytetarëve të Maqedonisë,” tha Mitrevski.

Talat Xhaferi vazhdoi ta drejtojë seancën e 82-të në gjuhën shqipe, ndërsa deputetët e Grupit Parlamentar të VMRO-DPMNE, në shenjë revolte braktisën seancën.

Ndryshe, seanca iu kushtua pyetjeve të deputetëve, dhe ishin paraqitur mbi 20 deputetë.