Pas aksidentit, Rama në Roshnik: Të rinjtë kthehen në fshat nëse…

Pas aksidentit të eskortës së Edi Ramës në fshatin Gosë të Rrogozhinës, kryeministri u shfaq në Roshnik të Beratit, pjesë e projektit “100 fshatra”.

Me zhvillimin e turizmit, tha Rama, dhe mundësia që të rinjtë të kthehen në fshat është më e lartë, pasi do kenë punësim dhe mundësi më të mira ekonomike.

“Ajo që vlen të theksohet është që ne duam të bëjmë çmos që të përfshijmë edhe të rinjtë që e kanë parë gjithmonë të ardhmen jashtë fshatit duke menduar se jashtë fshatit ka më shumë mundësi se brenda në fshat. Patjetër jashtë fshatit fitohet më shumë kur brenda në fshat nuk ka asnjë mundësi, por me mundësitë që në kemi krijuar që thjesht shtëpinë tënde ti ta kthesh në një mekanizëm ekonomik duke e kthyer në një pikë mikpritje për të cilën ne qeveria të japim kontributin.”

Për të gjithë ata që kanë një ide kryeministri theksoi me këtë rast:

“Janë 100 mln lekë për programin 100 fshatrat për të gjithë ata që kanë një ide dhe që duan të bëhen pjesë e këtij procesi. Kush investon në argotizëm garanton një ekonomi të qëndrueshme familjare dhe nëse projekti zhvillohet krijohet edhe punësim për të tjerët. Financim për ata që kanë një ide për t’u zhvilluar,” tha kryeministri Edi Rama duke shtuar se në harkun kohor të disa viteve, Shqipëria do të jetë vendi me turizëm tradicional, me turistë që vijnë për ushqimin, për dhomën tradicionale dhe për ushqimin tradicional.