Rama i përgjigjet Bashës: Unë do pres provën shkencore nga prokuroria…

Kryeministri Edi Rama ka reaguar pas akuzave të kryetarit të PD-së, Lulzim Basha, për vëllain e Ministrit të Brendshëm, i cili akuzohet se ka drejtuar trafikun e drogës në Vlorë, ndërkohë që vëllai i tij ishte ministër.
Duke iu referuar deklaratës që dha në media, gazetari që bëri intervistën me Albert Veliun, Rama i ka cilësuar si fundi i llumit dëshmitarët.

“Zhytu Lulëzim zhytu, thellë e më thellë, nxirr nga fundi i llumit sa me shume nga këta xhevahirë dhe dërgojua vrap miqve të tu t’i përdorin kundër Shqipërisë!

Unë do pres me durim provën shkencore të audiopërgjimit nga prokuroria dhe këtu jemi, shqiptarët do shohin e do gjykojnë!”, tha Rama përmes një komenti në rrjetet sociale.

Pak ditë më parë Rama deklaroi se një nga laboratorët e kishte cilësuar video-përgjimin jo autentik, ndërsa sot tha se priste provën shkencore nga prokuroria. Rama nuk ka thënë se cili laborator e ka cilësuar videon e publikuar si jo autentik.

Kryetari i PD-së doli në një konferencë për mediat, duke theksuar edhe një herë se Agron Xhafaj është një ndër kokat e trafikut të drogës në Shqipëri.