Zbardhet “Dosja 184″/ Dibër, Basha: Ymer Lala bleu votat me dy ministrat…

Kryetari i Partisë Demokratike, Lulzim Basha, në turin e tij nëpër Shqipëri sot vizitoi Dibrën ku gjithashtu, për fat të keq, konstatoi një situatë të mjerë, biznese që mbyllen dhe ku humbja e shpresës ka pushtuar vendin.

Duke i ftuar qytetarët e këtij qarku përë pjesëmarrje masive në protestën e 16 marsit, Lulzim Basha u kërkoi dibranëve t’i prijnë kësaj beteje, pasi ishin kurbani i parë i Edi Ramës dhe Aleancës së tij me krimin e organizuar; Eksperiment të cilin Arben Ahmetaj dhe Damian Gjiknuri e realizuan me sukses me ndihmën e Ymer Lalës.

“Dibrës i takon të jetë në krye të kësaj beteje, sepse Dibra ishte kurbani i parë i bashkimit të Edi Ramës me kriminelët, me trafikantët e drogës dhe të vajzave dhe grave. Këtu në Dibër në shtator të 2016 u bë eksperimenti i parë i Edi Ramës me aleancë me krimin. Vendosi të sjellë në krye të vendit, kriminelët për të nënshtruar demokratët dhe për të zhdukur socialistët e Dibrës. Tash dy vjet e gjysmë dibranët e dinë se zot në shtëpitë dhe bizneset e tyre është Edi Rama dhe Ymer Lala, janë horrat dhe kriminelët,” tha lideri i opozitës ku zbuloi edhe emrat e dy ministrave dhe jo vetëm, nga “Dosjas 184” që janë përgjuar në blerje votash dhe kontakte me Ymer Lalën.

 “Dosja 184 është fundi politik i Edi Ramës dhe bandës së hajdutëve. Në këtë dosje janë kapur gafil, Edi Rama, Arben Ahmetaj, Sadri Abazi, Blerim Ndreu, Paulin Sterkaj, Ulsi Manja, Damian Gjiknuri duke bërë pazare me Ymer Lalën dhe krimin e organizuar për të blerë vota dhe për të mbushur kutitë e votimit, që të kapnin bashkinë e Dibrës dhe për të bërë eksperimentin që e vunë në zbatim në 2017”.

Prokuroria e Arta Markut dhe Donika Prelës e ka fshehur këtë dosje, tha kryetar i Partisë Demokratike, Lulzim Basha, por  kryeministri Rama dhe biznesmeni dibran Ymer Lala do të përfundojnë të dy në qelitë e burgut, ndërsa përfundoi: “Edi Rama ka qejf të rrijë me Ymerl Lalën.  Edi Rama dhe Ymer Lala do të rrinë bashkë në qelitë e burgut 313, aty ku e kanë vendin të gjithë ata që kryen vjedhjen e votave dhe instalimin e një pushteti kriminal.”