Raporti i DASH, Kosnett: Kosova vazhdon të frenohet nga korrupsioni
Ambasadori i Shteteve të Bashkuara në Prishtinë, Philip Kosnett, tha se Kosova vazhdon të frenohet nga korrupsioni, sulmet kundër gazetarëve, dëbimi i shtetasve të huaj pa një proces të rregullt dhe dhuna kundër pakicave, raporton RFE.
Ambasadori Kosnett i bëri komentet në Twitter, pas publikimit të Raportit të Departamentit amerikan të Shtetit për të drejtat e njeriut në botë në vitin 2018.
Kosovo 2018 #HumanRights Report released. A step forward taken w/ passage of revised Criminal Code. #Kosovo continues to be held back by corruption, attacks on journalists, expulsion of foreign citizens without due process & violence against minorities. https://t.co/kG5rakAwkL https://t.co/3FOWrFQiwd
— Ambassador Philip S. Kosnett (@USAmbKosovo) March 14, 2019
Ky raport, në pjesën për Kosovën, nxori si probleme: “kthimin e detyrueshëm të refugjatëve ose azilkërkuesve, korrupsionin endemik në qeveri, dhunën dhe kërcënimet e dhunshme kundër gazetarëve dhe sulmet kundër anëtarëve të pakicave etnike ose komuniteteve të tjera të margjinalizuara”.
Raporti vuri veçanërisht theksin te rasti i dëbimit të gjashtë shtetasve turq nga Kosova për në Turqi, ku ata, siç thuhet, janë kërkuar “nën akuza të paqarta”.
Dëbimi, i cili ka ndodhur në mars të vitit të kaluar, vazhdon të shkaktojë reagime nga qarqe të ndryshme për mënyrën se si është realizuar.
OJQ-të dhe Institucioni i Avokatit të Popullit në Kosovë kanë thënë se qeveria ua ka mohuar të drejtën shtetasve turq për të kërkuar azil ose për të apeluar vendimin për dëbim para gjykatës.
Presidenti, kryeministri dhe kryetari i parlamentit të Kosovës patën thënë se nuk kanë pasur njohuri lidhur me rastin.
