Vuçiç: Shqiptarët nuk e duan modelin e dy Gjermanive

Presidenti i Serbisë, Aleksandar Vuçiç, tha se mundësitë për marrëveshje me shqiptarët e Kosovës janë shumë më të vogla sesa kanë qenë, dhe Prishtina nuk do ta vazhdojë dialogun derisa të përfundojë mandati i administratës aktuale evropiane, raporton RFE.

Aleksandar Vuçiç përsëriti me këtë rast se Prishtina nuk do ta shfuqizojë së shpejti tarifën ndaj mallrave serbe dhe ato të Bosnjes, përderisa përgjegjëse për këtë situatë e bëri edhe BE-në, që sipas tij, ka mekanizma që do t’i kushtonin shumë shtrenjtë Prishtinës por që nuk po i zbaton.

“Pa një marrëveshje me Beogradin, Prishtina nuk mund të bëjë asnjëherë asgjë,” tha presidenti i Serbisë.

Ai mohoi se ekziston një plan prej 17 pikave për ndryshimin e kufijve me Kosovën ndërkohë tha se askush nuk e dëshiron një marrëveshje bazuar në modelin e dy Gjermanive.

“Shqiptarët më nuk duan të dëgjojnë për këtë, ata dyshojnë se Rusia do ta pranonte këtë në OKB, edhe nëse ne e pranojmë atë,” tha Vuçiç.

Ndryshe, bisedimet ndërmjet Kosovës dhe Serbisë janë ndërprerë për shkak të vendosjes së tarifës ndaj mallrave serbe nga ana e Qeverisë së Kosovës. Brukseli dhe Washingtoni po bëjnë thirrje që palët të ndalin veprimet që dëmtojnë procesin negociator dhe të kthehen në tryezën e bisedimeve.