Raporti i DASH/ “I pahumburi”, Rama: Përveç të keqes që u dëshiron syri…
Edhe pse e kishte nxjerrë Zv/ministrin e tij pas publikimit të Raportit të DASH, për të bindur shqiptarët se ne jemi keq por vendet e rajonit janë edhe më keq, Ministri për Europën dhe Punët e Jashtme, Edi Rama, ndërsa po mburrej me aftësitë e zëvendësit të tij, postoi në profilin e tij në Facebook bashkëbisedimin me gazetarët. E meqë iu fut kësaj pune u kujtua të kritikoj edhe sot, ata që kritikuan Qeverinë pas publikimit të Raportit i cili konstatonte Shqipërinë si vend tranzit për drogat e forta dhe bazë për grupet e krimit të organizuar që veprojnë në Shtetet e Bashkuara, Evropë, Lindjen e Mesme dhe Amerikën e Jugut:
“Të pamësuar të lexojnë, të paaftë të kuptojnë dhe të padëshiruar të shohin e të flasin tjetër gjë, përveç të keqes që u dëshiron syri e u nxjerr goja, rrugëhumburit e politikës e të medias e keqpërdorën edhe këtë raport si gjithçka tjetër, për të tërhequr zvarrë publikun në llumin e fjalëve të tyre,” tha i pahumburi, i madhi dhe fal zotit edhe kryeministri ynë Edi Rama!
Ndryshe, Departamenti amerikan i Shtetit në Raportin e tij thekson se Shqipëria është njëkohësisht burim i kanabisit dhe, gjithnjë e më shumë, një vend tranzit për kokainën dhe heroinën; DASH thotë se tranziti i kanabisit si dhe i drogave të forta komandohet kryesisht nga elementë të krimit të organizuar që transferojnë droga të paligjshme nga vendet burim për në tregjet evropiane; Raporti thekson se përveç zbulimit të laboratorëve të përpunimit të heroinës dhe kokainës në Shqipërinë veriore dhe qendrore Grupet kriminale shqiptare e trafikojnë kokainën dhe heroinën drejt tregjeve evropiane nga vendet burimore në Amerikën e Jugut dhe Azi; Në raport thuhet se korrupsioni në të gjitha nivelet e qeverisjes e kufizon efektivitetin e përgjithshëm të luftës kundër narkotikëve; Korrupsioni zyrtar, thuhet aty, është i përhapur dhe nxit një mjedis në të cilin trafikantët e drogës janë mjaft të aftë të veprojnë pa u ndëshkuar; Raporti thotë se shkalla e lartë e papunësisë dhe sundimi i dobët i ligjit kanë krijuar një ambient ideal për grupet e krimit të organizuar që shkaktojnë problemin e kontrollit të drogës në Shqipëri.
Por, DASH nuk e din se kryeministri i këtij vendi që quhet Shqipëri, nuk e ka humbur rrugën si gjithë të tjerët, e për të dëshmuar se Raporti është pozitiv, Edi Rama ka një Zv/ministër që e ka ngarkëuar me detyrën e ministrit dhe i cili është i mësuar të lexojë, i aftë të kuptojë dhe me dëshirë të shoh e të flas tjetër gjë, përveç të keqes.
Për ata që nuk e kuptojnë gjithë këtë çmenduri Edi Rama ju ofron një status, puna e vetme që aktualisht din të bëjë, sa në Facebook e sa në Twitter. E tani me raste edhe në Instagram për variacion”
Ja postimi i plotë:
Ministri në detyrë për Europën dhe Punët e Jashtme, Gent Cakaj, komenton për publikun Raportin e Departamentit të Shtetit për vitin 2018
(Të pamësuar të lexojnë, të paaftë të kuptojnë dhe të padëshiruar të shohin e të flasin tjetër gjë, përveç të keqes që u dëshiron syri e u nxjerr goja, rrugëhumburit e politikës e të medias e keqpërdorën edhe këtë raport si gjithçka tjetër, për të tërhequr zvarrë publikun në llumin e fjalëve të tyre)
