Dy parti politike shqiptare dhe një serbe garojnë në Veri

Komisioni Qendror i Zgjedhjeve i Kosovës ka mbyllur afatin e aplikimit për certifikim të subjekteve politike që duan të marrin pjesë në zgjedhjet e jashtëzakonshme për kryetar në komunat në veri të Kosovës, të cilat do të mbahen më 19 maj.

Në afatin e paraparë kanë aplikuar tri subjekte politike, Partia Demokratike e Kosovës, Lëvizja Vetëvendosje dhe Lista Srpska.

Komisioni Qendror i Zgjedhjeve tha se të gjitha aplikimet do të shqyrtohen nga Zyra për Regjistrim të Partive Politike dhe Certifikim, e cila më pas pritet t’i paraqesë KQZ-së rekomandimet përkatëse për secilën nga këto parti.

Në zgjedhjet e parakohshme për kryetarët e katër komunave të veriut të Kosovës, Mitrovicë Veri, Leposaviç, Zubin Potok dhe Zveçan patën paralajmëruar pjesëmarrjen dy parti, serbe dhe shqiptare.

Kryetari i Listës Srpska, Goran Rakiç, tha se ky subjekt politik do të marrë pjesë në zgjedhjet e parakohshme, në mënyrë që, siç ka thënë ai, shqiptarët të mos i udhëheqin komunat me shumicë serbe.

Zgjedhjet e parakohshme për kryetarë të katër komunave veriore të Kosovës, vijnë pas dorëheqjes së kryetarëve të mëparshëm të këtyre komunave, të gjithë përfaqësues të Listës Srpska, më 26 nëntor të vitit 2018, si shenjë proteste ndaj vendosjes së taksës prej 100 për qind ndaj mallrave të Serbisë nga Qeveria e Kosovës