Kryesia PD/ Bllokimi i rrugëve çdo të enjte, Basha: Për të kulmuar në 11 Maj…

Në mbledhjen që Kryetari i Partisë Demokratike, Lulzim Basha zhvilloi me Kryesinë dhe Kryetarët e Degëve të PD u vendos që përpara Protestës së Madhe të 11 Majit, opozita të zhvillojë edhe dy protesta, çdo të enjte, ditë kur zhvillohen seancat plenare të Parlamentit, duke bllokuar rrugët në të gjithë Shqipërinë.

“Koha kur në Shqipëri Edi Rama dhe kriminelët e tij diktonin zgjedhjet, ka marrë fund njëherë e mirë. Ne do të jemi në krye të protestave të qytetarëve, derisa të fitojmë betejën europiane dhe demokratike për të mos lejuar krimin elektoral të 30 Qershorit. Edi Rama e di se nuk mund t’i rezistojë presionit popullor, prandaj po kërcënon me burg. Edi Rama ka frikë, sepse e di shumë mirë, që një hetim i pavarur, çon në burg atë vetë, Vangjushin e tij dhe Damian Gjiknurin për blerjen e zgjedhjeve bashkë me krimin.”

Mesazhi i qëndresës qytetare për Edi Ramën, që iu frikësohet zgjedhjeve të lira si djalli nga temjani, është se nuk ka shpëtim prej tyre, tha Lulzim Basha duke shtuar:

“Ne jemi të gatshëm të sakrifikojmë çdo gjë për të mos lejuar që në 30 qershor të ketë një krim tjetër elektoral si ai i 2017-ës. Koha kur populli shkonte në burg dhe kriminelët në qeverisje, ka marrë fund. Politikanët e lidhur me krimin do të shkojnë në burg dhe populli do të çlirohet nga krimi dhe korrupsioni. Përballja do të jetë në çdo qytet në çdo shesh dhe rrugë të vendit për të kulmuar në 11 Maj në protestën kombëtare përpara kryeministrisë,” tha Kryetari i PD, Lulzim Basha, duke porositë Kryetarët e Degëve që të shkohet derë më derë e të jepet mesazhi.

Ndryshe të enjten e 25 Prillit, Opozita e Bashkuar bllokoi për 60 minuta 5 akset kryesore në vend, atë që lidhë Veriun me Tiranën ku protesta u zhvillua në Milot, Jugun me kryeqytetin me protestën në Sheq të Fierit, zonën e Juglindjes ku u bllokua rreth rrotullimi në Bradashesh të Elbasanait si dhe protesa në Tiranë, ku u bllokua rreth rrotullimin tek Sheshi Shqiponja.