Vettingu në Polici/ Përplasje komunistësh, Presidenti dhe Ministri i Brendshëm pa fe e atdhe!

Përplasjet e forta LSI-PS që tashmë pas emërimit të Ilir Metës President janë zhvendosur në relacionin Qeveri-Presidencë, po e bëjnë gjithnjë e më shumë qesharak shtetin shqiptar. Kjo përplasje komunistësh aq shumë ka degraduar sa i ka dhënë sot mundësinë edhe Ish-Gjeneral Sandër Lleshaj ta ofendon Ilir Metën shumë më keq se sa militantët e rilindjes.

Dikur dorë e hekurt e Partisë Socialiste, sot argumentat e Presidentit Ilir Meta nga Ish-Gjeneral Sandër Lleshaj vlerësohen absurde dhe paranojake.

Duke folur para Komisionit të Sigurisë Kombëtare ku u shqyrtua sot dekreti i Presidentit për kthimin e “Ligjit të Vetingut në Policinë e Shtetit”, Ministri i Brendshëm, Sandër Lleshaj zbrazi gjithë mllefin që kishte akumuluar që nga emërimi i tij si Ministër, fjalor ky që vetëm me Vettingun në Polici nuk kishte të bënte; Dhe, fjalor ky që e përdorin vetëm njerëzit pa fe dhe atdhe, pra komunistët siç janë Ilir Meta dhe Sandër Lleshaj:

“Vetingun në polici i takon ta bëjë SHÇBA. Vetingu nuk është politik. Me gjithë respektin për presidentin dhe institucionin e Presidencës, po paragjykohet një institucion i rëndësishëm në vend siç është Ministria e Brendshme. MB është një institucion me rëndësi në vend, që bën më tepër sesa një proces vetingu.

Standardi nuk është prekur aspak. Vettingu është një proces që nuk mbaron kurrë. Ja e kaluan sot vettingun, por ditën e nesërme ai polic vijon sërish të jetë në punë dhe në monitorim. Por dhe ata që do jenë të rinj në Polici do t’i nënshtrohen Vettingut. Thuhet se janë kundër SHÇBA-s, por kjo është përtej absurdit, megjithë respektin që kam për punonjësit presidencës, pasi kjo është një paragjykim,” tha Sandër Lleshaj dukshëm pa vetëdije për fjalët që i dalin nga goja deri sa thekson se nuk mund të paragjykohet as nga Presidenti dhe as nga askush një strukturë kushtetuese si Minsitria e Brendshme, kur dihet se nga momenti që Edi Rama u bë kryeministër dhe Saimir Tahiri titullar, ajo nuk është më strukturë kushtetuese por kriminale.

“Është e papranueshme, është një paranojë të paragjykosh ministrinë e Brendshme. Gjithashtu, as pavarësia e vetingut nuk është prekur. Ligji është kalimtar, ndërsa vetingu bëhet në çdo kohë. Kjo sepse edhe një polic që e kalon vetingun, nesër mund të bëhet pjesë e skemave mafioze dhe mund të largohet më tej. Pretendimi se SHÇBA kompromentohet është absurd. Çdo hyrje në polici do i nënshtrohet vetingut”, tha Ish-Gjeneral Sandër Lleshaj i bindur se Presidenti Ilir Meta nuk mund ta paragjykojë në këtë proces Ministrinë e Brendshme. Këtu si rrallë herë edhe mund të ketë të drejtë, të drejtën ekskluzive për të paragjykuar në këtë vend e ka vetëm Edi Rama!

Ndryshe, Presidenti ka kthyer për rishqyrtimi në Parlament Ligjin nr.20/2019 “PËR DISA NDRYSHIME NË LIGJIN NR. 12/2018, “PËR VLERËSIMIN KALIMTAR DHE PERIODIK TË PUNONJËSVE TË POLICISË SË SHTETIT, GARDËS SË REPUBLIKËS DHE SHËRBIMIT PËR ÇËSHTJET E BRENDSHME DHE ANKESAT NË MINISTRINË E BRENDSHME” pas shqyrtimit nga Presidenca ku konstatohet se ky ligj cenon parimet dhe standardet e vendosura në ligjin ekzistues nr.12/2018, “Për vlerësimin kalimtar dhe periodik të punonjësve të Policisë së Shtetit, Gardës së Republikës dhe Shërbimit për Çështjet e Brendshme dhe Ankesat në Ministrinë e Brendshme”. Ndryshimet e miratuara me këtë ligj nuk krijojnë garancitë e nevojshme se një proces kaq i rëndësishëm si vlerësimi kalimtar i punonjësve të Policisë së Shtetit dhe të Gardës së Republikës, do të realizohet në kohën e duhur, me objektivitet dhe paanshmëri, duke bërë hapa pas në raport me standartet e ligjit në fuqi.

Rishikimi i ligjit ekzistues nr. 12/2018, nëpërmjet ligjit të miratuar nr. 20/2019, bën të mundur që, kompetencat e realizimit të procesit të vlerësimit kalimtar të forcave policore dhe atyre të Gardës së Republikës, t’u hiqen komisioneve të pavarura teknike dhe t’i jepen Shërbimit për Çështjet e Brendshme dhe Ankesat, një organ ky në varësi të drejtëpërdrejtë të Ministrit të Brendshëm,” konstaton Presidenti duke dekretuar kthimin për rishqyrtim në Kuvend të ligjit nr. 20/2019.